benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Fascia y i Ladins recorda Ezio Anesi 10 agn da sia mort
scrit ai 14 November 2003 da les 23:42:07 da noeles

Persones

 

"I oms muer, ma les idees viv inant"

Ezio Anesi s'en é ju massa adora sun la flour dla vita - Al lascia n gran ensegnament: tegní adum ence ti momenc plu durs - El á fat na veira politica per i ladins

Les beles notes de Beethoven, Schubert, Chopin y Schumann, sonedes al piano dal maester Paolo Bernard da Cianacei che à porté dant n beliscim conzert tl teater de Ciampedel, à cherié la dreta atmosfera per recordé y onoré a la mioura vida Ezio Anesi, l politich, l amì, l om che é sté per i fascians n pont de referiment prezious y che nes à lascé dant 10 agn. Dant da la pert musicala él sté l president dl’Union di Ladins de Fascia, Antone Pollam y l secreter politich dl’Union Autonomista Ladina, Bepe Detomas (raprejentanc di movimenc che à endrezé chest moment de recordanza) a porté dant n pice entervent sun la figura de Anesi y sun i segnificac de sie laour y de sie empegn per duta nosta comunanza.



"Ezio s'en é ju sun la flour di agn - à recordé l dotour Antone Polam dal Maester - tl bel mez dla vita, canche l’esperienza madureda te duc i ciamps, da chel turistich a chel politich, ti essa dé l muet de dé l miec de el. Con Ezio onse perdù la persona plu capabla, l President e l’Aministradour, ma souraldut n om senzier y valent, n galantom y n amich fidé, che enceben ciarié problems griefs, giatova tres l temp  per scuté su la jent, per fé cater ciacoles con duc. ... Chest om, oml y sterch adum, à lascé n gran ensegnament: chel de tegnì adum, tres, ence ti momenc plu durs. Ezio fajova politica de chela plu veira, al dova sie temp y sia vita per l ben de sia jent, sia tera y sies raijes. Al é sté bon de conjobié moviment cultural y forzes economiches. Al é sté tres respetous de duc, ence di aversars: dlonch olà che al é ruvé se àl fat conesce, stimé y volei bon."

Ence l onorevul Bepe Detomas à porté dant con emozion sie recort de Ezio Anesi. Al à auzé fora i prinzips a chi che Anesi ti é tres ju do: ti dé na raprejentanza ai ladins tla politica y tles istituzions, l’unité y donca l’aspirazion a n moviment bon de fé sintesa anter politica y l’identité desche ressoursa per la Val de Fascia y per dut l Trentin. "Ezio sostegniva con forza la degnité y la nobelté dl empegn tla politica y al à tres laoré con l spirit de chi che é al servisc dla comunanza y a chesta ti dedicòvel temp y pascion, conscidran les enciaries prestijouses tres demé desche n strument per arjonje i enteresc generai di Ladins. Con el ál podù se concretisé l bujegn, l’intuizion y l’aspirazion de n grup de militanc dl’Union di Ladins de Fascia. Con el á la jent de Fascia giaté tla politica les rejons dl’unité, l coraje de revendiché si derc y la moderazion entenuda desche costruzion pazienta dl consens. Sia figura ne é nia demé n simbol per i militanc ladins y n ejempl per chi che se dà ju tla politica y tl’aministrazion, ma al é n pont de referiment per duc, souraldut per les generazions nueves. Te Ezio podonse giaté n model de vita y de pascion sterscia che ti dà n segnificat maiour: per n ideal azétel la fadia y l sacrifize."

 

Vidé dal sterch liam con sia jent y sia val se à Ezio Anesi  tres dé ju con gran pascion y dedizion tl ciamp politich. Dl 1980 él vegnù lité te Consei de Comun y al é vegnù metù ombolt, na enciaria che al tegnarà enfin canche al muer. Dl 1982, en previjion dles lites regionales dl ann do, vegnél metù su l’Union Autonomista Ladina y Anesi deventa president. Dl 1983 végnel lité desche indipendent tla lista republicana, al é l prum ladin dl Trentin a se senté tl’assemblea. Sterch dl consens giaté tla Val de Fascia (l 39% dles oujes) rùvel dant tl ofize de presidenza y dapò de merz dl 1984, végnel lité assessour suplent. Na esperienza curta che fenesc ai 31 de otober dl medem ann. Al mantegn purempò l’enciaria de conseier ladin enfin al 1988 canche al pensa de se prejenté endòdanuef a les litazions regionales. Al é n confront dur y per n pugn de oujes él l prum di nia lités. Chesta mazeda ne l destramet nia. La volenté de raprejenté i bujegns de sia jent, l empegn de mete adum na classa nueva de aministradours y dirijenc, de auzé l livel de scola y de tò pert a la vita politica, ma souradut l dejider che i fascians essa i medems derc di autri ladins deberieda al gran some de ti dé unité culturala y zivila a duta la comunanza ladina, l envueia dl 1992 a se candidé al Senat. Ciamò na outa giátel l consens de sia Val y al ruva a Palaz Madama, prum senatour ladin dla Republica. L ann do se candideia Anesi per les lites regionales di 21 de november, ma tla nuet dl 9 de november, entratant che al arciasova do na seira de campagna litala a Piné, ti dàl l bot a l’eté de demé 50 agn.

"I oms muer ma les idees resta - ova scrit dant diesc agn Danilo Dezulian - y ales seghita a jerve ti cuers di autri oms, adum al recort y al respet de chi che enfin a sen les à portedes inant".


 
Liams emparentés
· Deplú sun l tema Persones
· Chier te noeles


L articul plu liet te chest tema Persones:
Laudatio per dr. Paul Videsott


Valutazion dl articul
Cumpeida mesana de oujes: 4
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.348 seconc