Te trei edemes Govern Provinzial nuef al laour

Pruma senteda dl Consei Provinzial nuef ai 18 de november 2003

Te trei edemes déssela ester tant inant con l Govern Provinzial nuef. Les dezijions definitives vegnirà toutes entratant les proscimes does edemes à dit l president Luis Durnwalder do la senteda dl lunesc. Te chesta senta àl informé i assessours co che ales é judes les encontedes con i raprejentanc di partis lités tl Consei Provinzial nuef y coche el miena de jì inant. La idea é chela de jì inant con i medems partners de coalizion che fova enfin a sen, les tratatives de coalizion vegnirà bele enviedes via entratant i proscims dis. L Consei Provinzial nuef vegnirà cherdé ite ai 18 de november a sia prima senteda.  Luis Durnwalder, vedl y nuef President dla Jonta.

Enfin a enlaouta déssel ence bele ester cler chi che deventarà president y vizepresident. L President dla Provinzia à ence rejoné de na presidenza provisoria dl Consei, corida da na persona che fossa pona endò desponuda a dé ju la enciaria.

TUNEL DL BRENNER. L Govern Provinzial se aficia dassen per na partezipazion al gran projet dl Tunel dl Brenner. Per chesta rejon é l Govern dla minonga che l projet dess vegnì realisé da sozietés nueves a cheles che al tol ence pert i Governs dles Provinzies interessedes, sciche al fossa l caje con la sozieté dl´Autostreda dl Brenner S.p.a. Sen n iade él vegnù dezidù da ti sourandé a esperc la enciaria de laoré fora propostes che veid dantfora formes de cooperazion.

MONT DE SOUC . "Da dezember inant déssel vegnì metù man con na regolamentazion che coordineia y smendresc l trafich sun la streda", enscì à trat adum l President Durnwalder la posizion dla Jonta Provinziala tla chestion. La Provinzia ova contribuì con cin milions de Euro a realisé la furnadoia nueva da Souc su. Chest finanziament é vegnù pensé desche contribut a la sconanza dl ambient, smendran l trafich sun la streda. Con la daurida dla furnadoia nueva fòvel vegnù sburlé la sclujura dla streda a la sajon da d'invern. Sen éla tant inant da concretisé cie che al fova vegnù vedù dantfora, enscì l President. Denant che tò na dezijion definitiva vuel la Jonta endere empò ciamò ti cialé plu avisa a les obiezions ortiedes ite dal Comun de Ciastel.
(Fontana: osp)