benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Comentar: La Lista LADINS va inant
scrit ai 09 November 2003 da les 09:13:43 da noeles

Politica

 

"La steila da mont" à sen l temon tles mans

La storia  tles democrazies desmostra che la situazion pò ence se ouje - Willeit fova bon de se bate tres contra dutes les oposizions tla Consulta

(i.o.) Con interes àn liet la comunicazion dla lista "LADINS" che ala vuel jì inant con sie program, ence zenza mandat te Consei, condut la gran delujion per l resultat lital de chest auton, antia y ria da glotì. Samben, sen do les lites é l podei dla Svp (ladina) a les steiles, l 60 % y passa dles oujes, n resultat che si raprejentanc ne se à bonamenter nience aspeté te si miours soms, fosc adenfora de Franz Complojer, ombolt da La Val, che ova dit dant les lites "Ich versichere der Svp ein Bombenergebnis". Ela pò sen deté dassoula les condizions politiches y la direzion culturala, la direzion dl Istitut Ladin, la composizion dla Consulta Ladina che partesc su la tourta di contribuc a la cultura y à con chest ence forza de endrez, grems scolastics che vedlarà con uedli da falcon che al ne vegne ben nia ensigné massa ladin y e.i.  Y la Svp (ladina) pò se "pone" comot sun sie plomac penc de oujes, ela raprejenteia la stragran maioranza di ladins y pò reclamé: "la creta dla jent onse nos". L Edelweiss dà sen dant cie ora che al é.



L'esperienza desmostra che al podarà vegnì critiché, scrit y scraié tant che an vuel, ma deguna critica ne ruvarà tres, al plu dessenaràles. I grems politics vegnirà tegnis tòch da la Svp, deguna dezijion ne jirà tres zenza sie consens, deguna oposizion ne vegnirà plu tolereda. Willeit derzova ciamò fora valch. Al fova anter l auter president dla Consulta Ladina. Entratant si agn de ativité politica à p.ej. l Ladin Standard (LS) giaté flé, al à podù vegnì elaboré con sostegns finanziars provinziai y regionai. Les prumes publicazions ofiziales (does edizions dl statut de autonomia) é comparudes. L Istitut Ladin MdR à messù tré do dl 1997 per ne resté nia do streda, sceben ch l president dl MdR Valentin volova y vuel l archivié. Sen màncel chela soula ousc, "un soul contra duc" dìjovel che al fova tla Consulta, ma al fova bon de se bate tres, ence da soul, chest l gran merit de Willeit.

Ciunes é pa perdret les desfarenzies anter la "Svp ladina" y la lista "LADINS", tramesdoes dij de volei l miour per i ladins? Tla Svp ladina ésen dantaldut dla minonga che an mess se lié pro i todesc per arjonje "n bon nuz da conduje te majon", sciche H. Valentin dij. I ultims 50 agn vegn vedus desche na storia de suzes dla Svp, "dut cie che é vegnù arjont é sté merit dla Svp". Chisc ladins se muev donca con i todesc, vuel dì la Svp todescia é l pont de referiment. Dut cie che desturba chesta relazion strenta vegn vedù  criticamenter y desche n pericul potenzial, p.ej. n ladin scrit unitar per i ladins, la colaborazion interladina dla Union Generela. I ladins da souramont vegn apeina reconescius desche ladins, ence sce ofizialmenter ne l dìjen nia fora publicamenter oben "reconescius" demé canche al uega: "i vedeis ben colavia (Belun, Trentin) se stàn piec, perchel miec sté pro la Svp".

La Lista LADINS va depierpul te n'autra direzion. Cie che vegn vedù desche pericul da la Svp ladina, vegn vedù sciche travert potenzial da arjonje tl cheder dles poscibeltés: organisazion politica autonoma (desche te Fascia con la UAL);  la colaborazion interladina vegn veduda desche aodabla y nezesciara per tegnì en pé na lingaz y cultura y e.i. Donca pòn se imaginè che la desfidenza va enfin al miol y che al é scialdi tenscion anter chestes does vedudes politiches. An sa endere che con chestions "ladines" él rie da fé politica, da cueje valch, da sciaudé i anims, per gauja dl puech prestisc, dla puecia importanza che an ti dà generalmenter. Tematiches pura ladines sta junsom. Perchel fova les vedudes dla lista LADINS ries da trasmete a la jent. Al vuel ester na conduta, n catalisadour, ence sce al é na gauja "banala", na "protesta", desche enlaouta al scomenciament.

I litadours ladins à chesta outa opté, per les rejons plu desvalives, per la Svp (ladina), ai à araté che al é miec sté con chi che governeia. L'esperienza desmostra endere ence che les cosses pò se mudé, desche enlaouta dl 1993, canche la lista LADINS é juda per l prum iade sun l parchet politich, abinan atira adum 6.000 oujes de consens, dantaldut tl'Alta Badia, olà che al brujova l problem dl Aiut Alpin Dolomites che à fat da catalisadour, ma ence te Gherdeina. Perchel deguna rejon per la dè su completamenter. A chest fazit é ence ruveda la lista LADINS te sia ultima enduneda. Desche Willeit à dit, "za. 30% dles oujes romagn na oblianza", na ousc de oposizion à ence n valour dret important te na democrazia.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.424 seconc