La vita zacan tla Val Badia tl certl dl ann
Prejentazion dl liber "Val Badia. Usanzes, cherdënzes y tradiziuns", ai 14 de november a La Pli
de Daria Valentin
(if) L Istitut Ladin "Micurà de Rü" y la Union Maestri Ladins envieia en vender, ai 14 de november 2003, da les 16.00 tl salf dles manifestazions da La Pli a la prejentazion dl liber "Val Badia. Usanzes, cherdënzes y tradiziuns" metù adum dal dr. Lois Trebo. Ala se trata de na publicazion de 456 plates con 280 fotografies (en pert a colours y en pert a blanch y fosch) che prejenta la vita da paur da zacan tla Val Badia. L autour mostra su ciunes che fova les usanzes, les cherdenzes y les tradizions tegnides da joegn y manco joegn, da eles y ei, ti singui momenc dl ann. I giaton perchel informazions sun l chirì patron da San Blaje, sun l jì a uefs da Pasca, sun l mené sceibes en San Jenn, sun l vegnì de mont en San Michil y enscì inant.
Dlongia les truepes liejendes, stories y conties - en pert bele documentedes te d'autri libri en pert mantegnides demé a ousc - él tl liber ence da giaté n grumon de regoles de comportament y dl temp che daidova plu da giut regolé la vita dla persona y dla natura. La manifestazion vegnirà abelida da na cornisc musicala porteda dant dal cor di maestri dla Val Badia.
Sun l retrat: la tradizion dl mené sceibes é documenteda da Janmatie Declara ence per La Pli de Mareo enfin al secul passé, y dutaorela ciamò viva ti Grijons, tla Val Venuost y tla Cergnia/Friul, olà che an dij "tirâ las cidulas".
Redazion: an dess ence tegnì cont dl bel lingaz mareo che vegn adoré dal scritour Lois Trebo. N vocabolar rich d'esprescions veramenter ladines, prest celtiches, che lascia vedei ite tant granes che ales é les poscibeltés d'adoré n dret ladin te vigni ciamp canche an l sa veramenter endretura, zenza messei sauté ite te talianism y modernism da pueresc clompri.
