La sajun da d'invern mët defata man. Sce les condiziuns dla nëi le conzed in le proscim fin de edema, ai 6 de dezëmber, le conesciü punt de Sant Ambroje di talians. D'isté él gnü lauré sciöche les furmies por realisé desvalis mioramënc dla infrastrotöra di implanc portamunt da mëte man a Colfosch devers dl ju de Frara. Por rové söl ju messân baraté jö 4 iadesc lift. Sëgn àn realisé na cabinovia nöia da 8 posc' a d'acoplamënt automatich che condüj 2200 porsones al'ora y cun staziun intermesana. An ne arà nia plü bria de se temëi da se jeré da jì söpert. Atualmënter ne él baldi nia tröpa nëi ciamò.

Sön Frara él ince gnü miorè la pista de coliamënt danter le implant nü y la sentadoia de Val Setus. L'atra gran novité de chësta ota é la sostituziun dla furnadoia de Piz La Ila jüda in ponsiun, cun na cabinovia, tambëgn  en implant a d'acoplamënt automatich, mo da 15 posc' cun na portada mesana orara de 2200 porsones. Tres a La Ila él gnü realisè na sentadoia da 4 posc'   a d'acoplamënt automatich che rogosëia le vedl lift te paisc devers Gherdenacia. Ampliades é ince gnüdes les pistes Gherdenacia A y B. A Corvara àn realisè en implant nü, na sentadoia a 4 posc' cun "scüscia" da trà surajö por se sconè dal frëit che rogosëia la sentadoia vedla a 2 posc' sö Arlara.

rogosè=sostituì, remplazè