I posc´ da vicars romagn resservés ai ladins
Incö (30.11.2002) él gnü dè tres tl foliet "Dolomiten" la notizia che al é gnü scrit fora en concurs por 7 posc' da vicars por la provinzia da Balsan, 7 de chisc por candidac todësc y 2 dê ester por candidac ladins, ma che chisc dui posc' resservà ai ladins dê ester inzai gnüs dés ia dal Consëi Superiur dla Magistratöra a Roma, zënza spligaziun, ai talians al ultim momënt impede ai ladins. Insciö parôl da lì la notizia tl foliet "Dolomiten". Chësta notizia é ince gnüda dada inant dal radio ladin che à invié i ladins a tò posiziun. Sciöche al é resulté da inrescides ne é la noela nia vëi, i posc' é resservês a 2 candidac ladins.
I nes un informé pro le vicar dr. Mansueto Crepaz, instës ladin da Fodom y vicar a Trënt, che s'à instës dassënn spordü a d'aldì chësta notizia. Sön chëra àl atira telefonè a en Aconsiadù dl Consëi Superiur dla Magistratöra a Roma che ti à assigurè che al se à ma tratè de en fal de trascriziun che é bele gnü metü indërt. Al ne ê daldöt nia tles intenziuns dl CSM da fà chësc. Le proporz gnará respeté y i posc' é resservés ai ladins. Al ne é nia iüst che al vëgnes trat dainciarà profit politich te chëst caje.
