benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Dal Bancorin tla RAI Ladina
scrit ai 30 October 2003 da les 22:21:25 da noeles

Politica

Chiocchetti, Mussner, Willeit y Moroder a confront enseira

Nò de Florian Mussner al lingaz scrit ladin standard y scì a n lim lital - Mussner a Chiocchetti: l fascian tira plu al talian  - Willeit: l moviment politich LADINS jirà inant - Moroder: nia dut é merit dla Svp

 

Enseira  (30.10.2003)  él ju en ona tla trasmiscion Bancorin dla RAI Ladina n confront anter i esponenc politics Florian Mussner (Svp), Luigi Chiocchetti (UAL), Carlo Willeit (LADINS) y Leander Moroder (Verc) sun sies vijions y posizions politiches. La trasmiscion é vegnuda modereda da Erwin Frenes. La pruma domanda é juda a Carlo Willeit cie che el nen dij che la lista LADINS ne ti l'à nia fata a d'arjonje n mandat. Willeit: "Chest arà dessegur conseguenzes grieves, ajache l prozes de emanzipazion metù a jì da la lista LADINS se ciafa na gran arfereda o restarà enfinamai chiet y al sarà scialdi rie da pié l jol endò". Ma Willeit ne vuel nia la dè su, "ence sce al parenta, desplej y che al é rie da capì l resultat de chesta ultima vela. Empò, passa 4000 oujes é na bela cumpeida y l moviment di LADINS jirà inant per sia streda y per l interes dla jent ladina."



Florian Mussner se enjigna depierpul a tò tles mans les brenes y "sta a desposizion dla Svp per les enciaries che an vuel ti sourandè". Al tolarà tost su contac politics, per mez november él vedù dantfora na enconteda con i ombolc  de Gherdeina y dla Val Badia deberieda con i funzionars Svp dles does valedes per vedei desche ala dess jì inant.

L raprejentant de Fascia Luigi  Chiocchetti à dit che Fascia, na valeda che à na gran tradizion de ester de mendranza ladina y che sà ence de ester  bendebot de pilaster economich-turistich tla provinzia de Trent, dess vegnì reconesciuda con n majer peis politich, ciuldì pa nia con n post te jonta a Trent tl govern Dellai.

Lista LADINS y conseguenzes diretes dla desfata litala: Willeit Carlo dij che les conseguenzes sarà bele a curta veduda scialdi grivies y nia da souravedei. A Bulsan sparéscel la ousc y la figura di LADINS. Al sparesc la frazion politica dal parchet politich dl Consei. De autonomia de posizions tl Consei ne vedaràn degugn festucs y degunes pedies plu: i LADINS se cruziova enstesc di problems, de sies chestions y la lista LADINS à cialé de tré fora l miour te chisc ultims 10 agn y chel ti é ence garaté aboc:  n majer reconesciment di ladins tla mudazion dl statut tla forma de leges, pro la lege litala, pro la lege sun i referendums, ma giut nia dlonch y dut. Willeit: "Chel che i adoron é n bon statut de autonomia, na mioura regolamentazion dla proprozionala, la ofizialisazion dl lingaz, de plu sostegn al lingaz, de plu raprejentanzes: tl TAR, tla RAI, tla comiscion per la toponomastica, tles comiscions legislatives y e.i., davia che chestes é les fondamentes per na populazion". "Dlonch olà che i ladins à da avei na ousc nes ovanse festidié", à enjonté Willeit. "Chesta ousc autonoma é sen tomeda y al sarà rie avei de bones leges, davia che demé i ladins conesc miec sia situazion y si problems".

Per cie che reverda la lege litala nueva à Florian Mussner dit che el é per n lim lital per i partis. Contrars i LADINS che ova prejenté enlaouta (1998) n recurs a la Court Costituzinala che ti à dè rejon. Daverta la domanda sce la Svp pò jì soura chesta sentenza  costituzionala fora che dij clermenter che per i Ladins ne pòl nia vegnì aplichè n scialier lital.

Sun la constatazion de Erwin Frenes a Luigi Chiocchetti che al é vegnù critiché te Fascia che la UAL é tres deplù n partì lié a certli economics y che ala met viadedò i valours de cultura y de lingaz à Chiocchetti responù che "da les litazions àl audì fora da la jent che al é vegnù rejoné massa de mendranza, de autri depierpul aratova che al é  vegnù rejoné demè de zirconvalazions, de implanc portamont, de robes concretes". Per Luigi Chiocchetti se tràtela de jì inant con i valours dl moviment ladin y tl medem temp de i coniughè con i bujegns concrec.

Carlo Willeit arata che al ne é pa nia tant veir che al sie vegnù metù dantfora demeztroi demè la chestion etnica. Ma al é cler che dut taca adum. L bensté de na mendranza depen da les rejons che ala à, desche i todesc sà dret ben. L medem volòven arjonje ence per i Ladins. I Ladins mess ruvé a na segurté per sie lingaz, zenza pòn se desmentié dut l  discurs entourn na mendranza. Y chestes rejons fondamentales ne veidel nia respetedes tla Svp. Willeit: "Al è na desferenza sce i pò dì fora mia minonga liberamenter o sce ie son taché a les idees y a les propostes dla Svp che à n grumon de d'autri interesc. Per ejempl: chi ne à pa nia volù l assessour de dert per i ladins? La Svp. La Svp se à dé da fé te chest contest a renunzié a les rejons di ladins per conduje inant sie "assessour cherdé". L govern talian à dit de scì a n assessour de dert, la Svp à dit de no, chesta é la verité, l rest dut monzenaries", à dit soz Willeit ti confronc de Mussner.

Leander Moroder ti à dé rejon a Carlo Willeit. Tla provinzia da Bulsan ne vélel nia les rejons per duc unfat. Dutes les regoles messessa valei prinzipalmenter per duc: n ladin pò deventé president dla Republica Taliana, papa y enfinamai sant, ma nia President dla provinzia da Bulsan, nia da creie. Da Mussner se aspétel che al mete sun meisa sies oujes y che al sie bon de les fè valei. La contradizion: Bulsan à arjont la autonomia da Roma, ma sen ne vuel la provinzia nia  la dè inant ai comuns y a les valedes ladines.

Sun la domanda a Florian Mussner cie che al se tol dant: "Adum con la Svp fajaronse de beles propostes, i nes daron da fé per les raprejentanzes di ladins, cie che me sta a cuer é l laour tl ciamp sozial y tla economia olà che ie é bele esperienza."

Per cie che reverda l lingaz standard (LS) é l raprejentant fascian Chiocchetti plenamenter a una de porté inant chest projet. Dut l contrar Florian Mussner: l Istitut Ladin é tl laorè sun chest y l stude va inant, ma cis truep ne àl nia dessouroura. L assessour se sciauda ence .. Mussner:  "Ma percie messéssen pa mudè nost lingaz? Nos de Gherdeina rejonon Gherdeina y i Badioc badiot." Mussner é dla minonga che per introduje ofizialmenter n lingaz scrit standard messéssen damané denant la jent te n referendum. Te vigni caje nia mudè dut cant per i autri, ciuldì che i fascians o i ladins da souramont l vuel. Te chesta ocajion ti à  Mussner ence dè  na ficeda a Luigi Chiocchetti, dijan che sie ladin-fascian che al rejona entratant la trasmiscion tira cotant plu sun l talian che "nosta rujeneda".

Leander Moroder à perié Mussner y la Svp che ala tegne cont y veide ite che sun l ciamp dla cultura ladina à laoré te chisc ultims 50 agn truepes lies, unions y persones, ence nia liedes al partì Svp  y chest méssen reconesce:  nia dut é merit dla Svp. Per cie che reverda l ladins Standard, à  Moroder afermé che l model de standard à na rejon de ester y che an pensa demé de adaté valgugn particolars per che al vegne azeté de plu da la jent.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Da Bancorin tla RAI Ladina (ponc: 1)
da travers ai 30 October 2003 da les 22:43:36
(Infos sun l utilisadour | Ti mané n messaje privat)
Ma de cie rejònel pa perdret berba Mussner? Cie che al dij dl lingaz ladin ne à no cef no coda. Sce al se liejessa n iade a l auter valch liber de linguistica ladina denant che tré fora de tel strambaries. Ma al sarà ben perchel che l patron dla SVP l ova metù assessour a la cultura ladina. Y da sen inant?.



Re: Da Bancorin tla RAI Ladina (ponc: 1)
da giatfosch ai 31 October 2003 da les 00:48:21
(Infos sun l utilisadour | Ti mané n messaje privat)
insciö vara sc'an met n cargà a fà l pitur. Mussner ne sa nia de nia tla cultura y tl lingaz. Schuster bleib bei deinen Leisten. Mussner ô n limo lital = antiminoritar. Mussner é cuntra l ladin standard = pur la tripartiziun = por le tort fat da Mussolini.
Schiche Mussner rejona "gherdeina" é ince n capitul a pert. Y gherdeines rejona pu mez todesch, un indo l'ater!
Moroder me à der plajü, al é inteligent, analitich, sà de s'articulé, mo ciodì, orca la miseria, aplicheiel chestes cualitês tan püch?!




Re: Da Bancorin tla RAI Ladina (ponc: 1)
da Jepele ai 31 October 2003 da les 09:04:05
(Infos sun l utilisadour | Ti mané n messaje privat)
Scì, Willeit dess jì inant. Al ne é nia demé cheles 4.000 oujes per i LADINS. I ne podon nia nes desmentié che te Fascia èl n partì ladin che à la maioranza, la Union Autonomista Ladina che met l aconsiadour y l assessour. A livel regional saràl el la persona de referiment.

Per cie che reverda l Spell desmostra Mussner de avei n livel scialdi bas, nia a l'auteza de n assessour a la cultura ...



Re: Da Bancorin tla RAI Ladina (ponc: 1)
da Dolasila ai 31 October 2003 da les 12:38:42
(Infos sun l utilisadour | Ti mané n messaje privat)
Mussner por l limo lital. brau.

ciodì messass i gherdeines müdé lingaz? Ciodí nia baié inant ch'ai fej telefonieren pur avei na Erlaubnis per n Durchführungsprojekt de n ...



Re: Da Bancorin tla RAI Ladina (ponc: 1)
da Jepele ai 31 October 2003 da les 12:58:49
(Infos sun l utilisadour | Ti mané n messaje privat)
.... pona udran baiter sciche la cossa se fej entwickeln, mè bon che n à la Partei hinter sich ... l beriemter Kooperationsmodell dla Svp .... chesc sona danz manco talian ..



Re: Da Bancorin tla RAI Ladina (ponc: 1)
da Jepele ai 31 October 2003 da les 15:18:46
(Infos sun l utilisadour | Ti mané n messaje privat)
Al sarà veramenter rie che zenza Carlo Willeit, zenza sies conescenzes aprofondides de duta la materia giuridica che valch posse se mudè, che la lista LADINS vae inant, con el a cef sun lista fòssel stè magari poscibel abiné cà l mandat, sce an analiseia les oujes de preferenza àn chesta imprescion ..... massa trueps vuel demé fé cariera politica y per chesta rejon descuerei ence l ladin sciche lietra .... penson al obman de Gherdeina Perathoner, a Crazzolara enlaouta, a Malsiner y e.i. duc te n iade "gran ladins" .....



Re: Dal Bancorin tla RAI Ladina (ponc: 1)
da Janpire ai 03 November 2003 da les 06:51:10
(Infos sun l utilisadour | Ti mané n messaje privat)
Mussner é por:

1. N lim lital (cundüt che na SENTENZA COSTITUZIONALA à dit de nò a n te' lim por sconè i ladins)

2. cuntra n lingaz scrit unitar (spell)

cun chesta impostaziun desmòstrel de ester cuntra la Costituziun y ergo cuntra i Ladins.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.373 seconc