Does persones, una na pascion: chela per la fotografia
Hans Pescoller y Alfred Erardi dà ca truep de sie temp lede per fé fotografies
de Mateo Taibon
Hans Pescoller y Alfred Erardi dà ca tröp de so tëmp lëde por fà fotografies. Les fadies é granes, mo granes ince les sodesfaziuns. En gran numer de fotografies é gnüdes publicades te en liber en gaujiun dl ann internazional dles munts, en liber che à bele albü en gran resonn. Dai 3.000 esemplars che l’Ert por i Ladins orô dé fora ê bele dan la presentaziun dla publicaziun 2.800 venüs ia. Y püc dis dô la presentaziun pel che le liber sides apëna ciamò da ciafé, tan grana la domanda.
Por cater agn à Pescoller fat jö paisaji dolomitics - pizes, prês con scofes, lês de munt, legns, ciöfs, de gragn podruns - film do film, por cöie adöm le material por le liber sëgn danman: „Dolomites, pizes magiches". Cater agn alalungia, insciö cunta Pescoller, àl dé ca döt so tëmp lëde por fà jö. Fà jö é „scrì cun la löm"; y por avëi la löm dërta, por avëi i corusc bi, „magics", val gonot debojëgn da jí sön en post dui, trëi, ince cater iadi y spetè, cina che le monn se presentëia cun chël „tocco magico" che fej la fotografia bela. Pescoller à bele publiché i libri de fotografies „Val Badia", y „Tera ladina Dolomites"; entrami i libri à albü en gran suzès.
Alfred Erardi, insegnant, à tambëgn agn alalungia fat fografies denant che rové pa na vedla Linhof dai agn 60, en aparat por le format gran, aparat porì mecanich. Por imposté na fotografia pàssel almanco 20 menüc, datrai ince n’ora entiera. Nia „knipsen" porchël, mo ert dla fotografia. Y por fà fotografies te chësta maniera mëss un osservé avisa la natöra - ara ne va nia da tó fora l’aparat vigne iade, ciaré tres y indô atira le mëte ia sce le motif ne plej nia. La fotografia vëgn oramai na meditaziun.
Hans Pescoller fej jö con so aparat 6 x 4,5, le format mesan, y na ligna de otiches, co é jüdes tai scioldi y va ince sön le spiné, por so pëis. Le format dal fotogram é zirca trëi iadi tan gran co chël dles fotocameres reflex standard, les 35 mm. Insciö àn na definiziun cotan plü alta, na reproduziun dl detai plü bela, y laprò ince la poscibilité da fa ingrandimënc de de gran mosöres.
Pla publicaziun nöia „pizes magiches" é chësc da odëi: la cualité tecnica dles beles fotografies é alta. En liber, olàche cualité dla fotografia y cualité dla reproduziun é a en alt livel. En liber, olache amur por la natöra y amur por la fotografia é metüs adöm. Cater i lingac dles spligaziuns a fà le liber internazional.
