benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Dal European Bureau for Lesser Used Languages (EBLUL)
scrit ai 20 October 2003 da les 18:22:38 da noeles

Cultura

 

Tant costa pa l multilinguism?

Te na sozieté monolinga mess i zitadins che rejona n lingaz minoritar daidé finanzié i servisc culturai per la maioranza

de dr. Erwin Valentini

L European Bureau for Lesser Used Languages (EBLUL) à organisé ai 13 de otober a Bruxelles, en colaborazion con l Parlament europeich, na conferenza sun l tema «Focus on linguistic diversity in the new Europe”. La conferenza volova dantaldut ti pité n forum a les mendranzes linguistiches di paisc candidac per porté dant siei problems y enrescì cie che ales pò se aspeté da la Union europeica (UE). I problems di paisc dl est é trueps y gragn; per ejempl, la Slovachia, n paisc de 5.5 milions de abitanc, compeida na doseina de mendranzes linguistiches y culturales. Sceben che duc chisc paisc ae lité per la democrazia liberala y n valgugn ae ence sotscrit la “Charta europeica di lingac regionai y minoritars” dl Consei d’Europa, ne se ài ciamò nia delibré dldut dl’arpejon storica vedla de cenc de agn. Da una na pert ne corespon la politica reala di governs nia dagnora a les declarazions de prinzip, da l’autra pert souravìvel tenscions y conflic anter popui y etnies che à marscé per secui la sozieté dla Mittel-Europa. Les mendranzes de chisc paisc veid tla costituzion dla EU na garanzia de democrazia y n cheder politich-giuridich per fé valei siei derc visavis dles autorités nazionales.



Ma zenza se fé demassa ilujions: la costituzion europeica trata derc dles medrenzes demé indiretamenter tres l prinzip di derc dla persona che vigni stat member mess respeté. Duc sà indere che les beles entenzions é vuetes sce ales ne vegn nia concretisedes te normes de atuazion, y chest depen da la bona volonté dles maioranzes. La dissonanza anter l dì y l fé é perauter grana per cie che reverda la protezion dles mendranzes ence te trueps paisc iperdemocratics dl’Europa dl west.

La politica linguistica, y donca ence la sconanza dles mendranzes, é na competenza che ti speta in primis ai stac membri, l’Union pò demé daidé pro con mesures complementares aldò dl prinzip de susidiarité. Fina dant da puech ova la Commiscion europeica n program y n budget aposta per i lingac minoritars; ence i ladins à giaté fora de chesta ola contribuc per proiec culturai (scola, elaborazion y standardisazion dl lingaz, y e.i.). Da sen inant sarà l contribut comunitar plu indiret y infrastrutural: la Comiscion à aprové dant da puech n Plan d’azion (2004-2006) che preveid contribuc per azions souranazionales per l’ensegnament di lingac y la promozion dl multilinguism. L Plan d’azion é lié ai programs Socrates, Leonardi da Vinci y MediaPlus y da chisc tòlel ence i finanziamenc nezesciars. L azent é sun l ensegnament di lingac ma al vegn ence finanzié azions de infrastrutura y de difujion dles esperienzes fates da vigni pert dl’Europa. La noela negativa per les mendranzes é che al ne vegn fat deguna desferenza anter gragn y pici lingac; chest vuel dì che i lingac minoritars mess se bate contra la concorenza di gran lingac y al n’é nia rie da capì coche i raporc de forza ciala fora. L Parlament europeich à ben envié, te sia resoluzion ai 4 de setember 2003 (relazion Ebner), la Comiscion a tegnì cont dles racomanazions dla “Charta” y de mete empé anter l auter na agenzia europeica per l multilinguism “che tegne cont endretura di lingac minoritars y regionai europeics”, ma i savon coche ala va tla EU: l Parlament propon y l Consei (esprescion di governs nazionai) va do sie troi. Perchel ne él nia da se fé demarevueia sce i raprejentanc dles mendranzes che à tout pert a la conferenza a Bruxelles ne fova nia cis contenc; a truepes mendranzes ti vegniràl a mancé chel aiut moral y material che jissa debujegn per svilupé sie lingaz y sia cultura.

Les conferenzes internazionales, sciche chela organiseda dal EBLUL, é n forum de discuscion olà che an auda dagnora les medemes beles paroles dles autorités politiches y i medems baudiamenc di raprejentanc dles mendranzes. L referat plu enteressant che an à podù audì é sté, do mie vedei, chel dl prof. F. Grin sun l tema “Valuating linguistic diversity”. F. Grin, che é professour de economia a Genève, refuda l cliché che l multilinguism é massa cer y desmostra con argometazions economiches che l cost de n servisc bi- o trilingh é puech y nia en confront ai benefizes per la sozieté entiera. Per ejempl, l cost per persona-ora di programs welsh tla Gran Bretagna é de 0.5 EUR, chel dles trasmiscions radiofoniches per svedeisc tla Finlandia é anter 0,10 y 0,15 EUR. L cost extra dla educazion bilinga tl paisc basch é de zirca l 3% dla educazion monolinga. L prof. Grin consieia de paridlé l cost dl plurilinguism con les speises per l ambient. Nos podon souravive zenza parcs naturai, ma la cualité dla vità fossa plu bassa zenza de tel ambienc y perchel sonse a una de spene scioldi per la conservazion dla natura. L medem argoment pòn adoré per i lingac: nos podessan zenz’auter souravive con n lingaz soul, ma na sozieté monolinga vegnissa sentida sciche n paesaje con demé una na sort de ciofs o de legns y donca sciche n ambient cultural monoton y da stufé. Da enrescides fates pro i studenc te plu posc’ él sauté fora che duc, zenza ezezion, é a una de paié l priesc de servisc multilings (p. ej. tla Svizra y tl’ EU), ciuldì che ai auza la cualité dla vita y dla cultura. Ma l multilinguism à ence na valenza soziala. Te na sozieté monolinga mess i zitadins che rejona n lingaz minoritar daidé finanzié i servisc culturai per la maioranza. L prof. M. Kontra, member dla Academia ungareisa dles scienzes, a formulé polemicamenter la chestion enscì (titul de sie referat): “Dess na mendranza linguistica paié l’educazion de na maioranza?”.

Per i ladins pò de tel argomenc soné n puech vuec o selbstverständlich. Nos on scoles, media scric y audiovisifs, istituc culturai, documentazions y comunicazions publiches per ladin, donca i on dut cie che va debujegn. Veramenter dut o mess ence i ladins finanzié la maioranza? Fajon mo na proa: canche n ladin va te n ofize o te na strutura publica a Bulsan, a Trent o a Belun méssel rejoné talian y/o todesch, canche n talian o n todesch va te comun de Badia a damané na informazion o n document pòl rejoné te sie lingaz. Al mancia na simetria anter i derc dla mendranza y chi dla maioranza; i ladins giata demanco che i zitadins talians y todesc ma ai paia les medemes coutes che siei vejins. Donca ence i ladins mess finanzié l’educazion linguistica dla maioranza.

 


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.383 seconc