benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Chiocchetti: I ti daré mia ousc a la Union Autonomista Ladina
scrit ai 20 October 2003 da les 17:19:49 da noeles

Politica

 

Al vuel ester n projet global per conduje adum la comunanza ladina

I contac de colaborazion interladina tl ciamp dl lingaz é praticamenter n dejaster

de Fabio Chiocchetti dl Goti/Moena

I volesse con chest contribut porté dant valgunes reflescions en cont dl endrez che l moviment politich ladin te Fascia à conesciù da n trat encà, y sclarì tl medem temp mia posizion tedant les litazions, ajache valch outa sun la stampa dut é vegnù reporté n pue massa alalesiera a chestions personales o de paisc. Defat, canche en chesta aisciuda éi dé de retourn la tessera, éi volù dé n segn sterch de critica ti confronc dla dirigenza dla Union Autonomista Ladina (UAL), y descedé na reflescion che perauter ne é nia vegnuda adalerch. Ala se tratova aboncont demé dl ultim episode de dejaje che se fajova sentì da n bon trat encà.  L laour per fé cresce y renforzé la coscienza ladina é dut auter che fenì y dess jì soura i confins teritoriai fora.



L’Union Autonomista Ladina é "nasciuda" desche moviment de regoiuda (Sammelpartei): passé sourafora les ideologies é sie ester plu fon, sie DNA, enfin dal scomenz. L liam che tegniva adum enlaouta  persones de orientament y colour politich desferent fova l sentiment de pertegnuda, la coscienza de n patrimone comun da defene y valorisé: te na parola l’identité ladina. Da chest vegniva ca l obietif essenzial dl moviment, chel de arjonje per la mendranza ladina n livel de reconesciment y de stravert indispensabel per garantì sia souravivenza.
L percurs dl moviment te nosta region é sté na batalia de democrazia y de zivilté, n apel a la toleranza, al respet per la desferenza, per la defenura di plu debli. Chest spirit à animé l’azion dla UAL per cotanc de agn: al é i "valours stersc" che l medem candidat president Dellai à reclamé en lunesc ai 6 de otober sa Poza, valours ruvés ite ence te sie projet politich, encuei pont de referiment de forzes politiches desferentes coalisedes per l govern dla Provinzia de Trent.
Emben, chel che encueicondì vegn prejenté desche la trasformazion finala dla UAL te n "partì teritorial" (adoran con gust na esprescion de moda, tipica de Dellai, magari demé per se fé volei bon) é l frut de n prozes nia dl dut nuef, y nience zenza pericui. Dai agn ’90, dilan a l’intuizion de Ezio Anesi, fòvel vegnù envié via n projet per deslargé la basa soziala dla UAL, che piova via dal bujegn de abiné a una entourn al idealism ladin les forzes economiches y soziales de duta la valeda, per mete adum n "bloch" massif de interesc ideai y materiai. Tl medem temp savòven dret ben che de gre en gre che al vegniva arjont n cheder de sconanza tres majer, ence la sburla revendicativa dl’UAL fova destineda a vegnì plu flevoula (debla).
Ma l pericul é sen n auter: l pericul é l reclam ai valours dl moviment, l empegn per l’identité de mendranza, l’azion per l svilup dl lingaz y dla cultura, vae tres deplù sot ju bel plan y definitivamenter, tedant ai interesc economics (magari ence legitims), tedant a les rejons de schierament y de categoria.
L pericul é concret, y l sterch apel de Dellai ("remideves de chi che ves conscidreia jent che pensa demé ai afars!") ne à nia soné dl dut fora de luech, y al  ne é nience ruvé tl vuet, a sté a l’emozion che al à descedé ti auditours en chela seira. L pericul é, y l reclam al "orgolie ladin" é plu che giustifiché: i podon ence conscidré debota sareda su, per l moviment ladin, la fasa di slogans y dles revendicazions, ma l laour per fé cresce y renforzé la coscienza ladina é dut auter che fenì. Tant per scomencé, la plena atuazion dles leges de defenura é ciamò dalonc dalonc... Fosc él chi che ne se n’anadà nia, ma te Fascia l lingaz (cuintessenza dla identité per na mendranza) é te na situazion de gran dejaje, per ne dì nia dl livel di contac de colaborazion interladina, che é damprò al dejaster.
Zenz’auter ti ultims agn l’UAL à fat de biei varesc inant sun l troi dl’agregazion dles forzes soziales, y de chest la "scuadra" metuda adum per les lites é spiedl y testemone. Ma tl medem temp l’atenzion per i "valours stersc", chi che tegn ite l’anima y la storia dl moviment, someia dassen smendrida. La chestion dl lingaz y dl’identité ne pò nia vegnì metuda te n cianton desche na massaria da zacan, na vedla tematica supereda, o ciamò piec touta ca demé vignitant desche element decoratif da la saour folcloristica, y nience lasceda dl dut a valch aparat burocratich, o a valch assoziazion o istituzion culturala. La chestion dl lingaz y dl’identité, desche al à dit giustamenter Dellai, mess (cogn) ester l "focus" che consent de mete adum n projet global per la comunanza ladina (y nia demé per la lista per jì a provedei, o la lista dles priorités), n projet che lasce antervedei na idea de davegnì per nosc joegn y per nosta jent.
Dit autramenter, la sintesa anter les istanzes desferentes dl teritore ne pò nia vegní fata demé sun l fondament di numers, o sun l peis sozial di singui componenc, o sun rejons de oportunité: ala à da vegnì fata sun les idees, sun l confront y poester sun l confront da temei (senester), ma dagnora tegnan ben frem l fondament di valours che segneia l moviment ladin fin da sie nasce, y che segneia sia "desferenza" respet a vigni autra forza politica.
Personalmenter ne creii nia che la UAL sie deventeda "un inutile ricettacolo di interessi forti", ma ala risia de deventé zeche de tel, sce  ala se perdarà do streda chisc valours, sce ala se acontentarà de ester DEMé "partì teritorial". Chestes é les rejons de mie contrast con la direzion dla UAL da sen, mie cruze dant ai segnai de involuzion che an anterveid bele a la fin di agn ’90, canche i me é demetù da l’enciaria de segreter politich (1.12.1997), segnai che i fac vegnus do (enfin a la chestion dl Polo scolastich de Moena) ne à nia fat auter che confermé: al fova segnai de na fasa nueva per la UAL, n mudament de natura y de spirit, olache bel plan covòvel (se fajòvel sot) logiches de corporazion, enteresc personai, mancianza de debata, defizit de idealité, puecia consciderazion per i valours dla democrazia, dla toleranza, dla defenura di plu debli, puech respet per les persones y per les idees.
Condut chest, ai 26 de otober ti daréi ciamò mia ousc a la UAL, y i enviaré duc i fascians a fé autertant y a cerne fora anter i cadidac sun lista cheles persones che raprejenteia miec chi valours costitutifs dl moviment ladin, ajache i vue creie che tla comunanza ladina - a despet dla globalisazion y dla sozieté de benester - siel ciamò lerch per la coscienza ladina y per persones che sae da la interpreté y da la porté inant: acioche chel pice fuech ne se destude nia.
 
Ai 19 de otober
 
Fabio Chiocchetti dl Goti

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Chiocchetti: I ti daré mia ousc a la Union Autonomista Ladina (ponc: 1)
da travers ai 21 October 2003 da les 10:30:00
(Infos sun l utilisadour | Ti mané n messaje privat)
Ie ne son nia fascian y i ne conesce nia avisa la situazion "teritoriala" dla ladinité fasciana, perempò me per che les conscidrazions de Fabio Chiocchetti ae na fondamenta no demé per sia valeda ma per duta la Ladinia. L medem discurs podéssen ti fé ai partic che chir te chest moment la ousc di ladins tla provinzia de BZ. L pericul che i ladins perde sia identité lascian jì a ramengo sie lingaz y sia cultura (no la "cultura" folcloristica mantegnuda en vita per l turism y adoreda sciche eticheta politica, ciala la SVP "ladina") é sterch ence te Badia y Gherdeina. Y ence te chestes valedes se sclùjen ite te sia teritorialité ("i ladins de Sudtirol") endeblan a chesta moda i lians con " i ladins de Souramont".
L pericul che la coscienza ladina, y con ela la comunité ladina, se desfante é gran. La medejina contra chesta necrosa é chela indicheda da Fabio: "l laour per fé cresce y renforzé la coscienza ladina dess jì soura i confins teritoriai fora".


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.368 seconc