Ester politicamenter autonoms vuel dì laoré plu davejin a la jent
Arateise che al fossa vegnù fat dutes chestes operes zenza la sburla dla Lista LADINS?
de dr. Lois Castlunger dla LL
Mies trei respostes a les trei domandes metudes dant da la redazion (ciala plu enju per les domandes, ndr):
1) Sce i volon souravive sciche mendranza, spo messonse ti dé na majera importanza al lingaz, chel vuel dì se dé da fé per giatè n lingaz ladin scrit unifiché, y crié les normes per l ensegné y l adorè.
2) Na raprejentanza autonoma é de gran importanza per vigni mendranza, ciuldì che demé enscì ciafia na mendranza de lascé audì sia ousc autentica, zenza ester condizioneda. Chest ne vuel nia dì che ala fej dut da soula, ma ala se chirirà chi partis che é a una con sie program y che deida realisé chest program.
3) Per via di contribuc volessi plutost fé la domanda a la jent: "Arateise che al fossa vegnù fat dutes chestes operes publiches, sce al ne esistessa nia la Lista Ladins, che te chisc ultims diesc agn ti à fat jì la pompa al partì de maioranza?!". Al é da encresce che valgugn ombolc à puecia sensibelté per la coscienza ladina, depierpul che ai se comporta da gragn oportunisc’ per la ilujion de tré fora n pugn de scioldi.
