Südtirol: democrazia en pericul, massa truepes unions de rejim

Dr. Carlo Willeit: Les somes enormes per l reclam vegnirà tert o adora trates ite dai zitadins tres sies coutes

Sun les pratiches de reclam politich, sen dant les lites, tol posizion l vize-president dl Consei dr. Carlo Willeit con chestes constatazions: „Metù man àn con brosciures ofiziales y relazions de plates y plates sun foliec dl dì y dl’edema: laudes a se enstesc paiedes con les coutes. Spo végnel entent auti y ai deventa 30% miourmarcé, vuel dì zachei paia l 30%. I taxis sforza i clienc de fé propaganda per i candidac che paia l plu. I radios privac vegn destenus y tl radio y tla televijion publica ne pòl nia plu vegnì fat confrontazions politiches publiches. Y les unions pò o miec mess fé reclam per la Svp. I membri y/o candidac de d’autri partis vegn bandis y pò se fondé na sia union, l’unica medejina contra la politica clientelara y l entravai de unions de categoria de rejim.

Nia tant saurì, davia che i top-managers sciacareia fora contrac y tarifes nueves y l certl met man danuef. Y la propaganda direta, daverta tres l material a desposizion de duc ne vegn nience nominé. Y dut cant chest costa trueps scioldi y unfat sce al vegn paié diretamenter o indiretamenter, a valga maniera mess l costiment vegnì paié y trat ite. L paiament ai aconsiadours ne cleca nia plu y perchel méssei samben giaté zeche deplù.“