Co ‘l noo "pacchetto promozionale" betù aduna pa’ ra fèštes de Nadà, in Anpezo ra štajon da d’inverno ra šcomenza, par ci che fisarà ra vacanzes dai 21 ai 26 de dezènbre, con zinche dis a ‘l prezio de cuatro. El "Superski Dolomiti", ra Sozietà de i Hoteliére e ‘l Consorzio Cortina Turismo i a betù fòra loutradì un šfoéto, agnoche i moštra ra ofèrtes par d’inverno, i fèš conoše i cuarantadoi hotiéi d’Anpezo e i špiega ce che po coštà ‘na setemàna d’inverno. Inze un’ofèrta ‘l é sète dis a mèsa penšion inze ‘na camera dopia co ‘l baign, ma zenza skipass; el prèzio el va da 360 a 1890 Euro, conforme ‘l hotèl che se cura fòra.

Intrà che’s òutra ofèrtes, ‘in è anche una ciamàda "Prin Gnée". Dai 30 de noènbre ai 22 de dezènbre, ci che va co i šchie, i ciaparà un dì par debàn, ogni cuatro fisàde e pagàde. Dai 12 infin ai 19 de jenàro, pa’ ra gares de Copa de ‘l Mondo de Šchie, ci che se fermarà ‘na setemàna inze alcuante hotiéi i ciaparà un biliéto par sì su a se vede ra tré gares. Dai 15 de marzo infin a ra fin de ’l inverno, i pize che i a manco de oto ane i ciaparà ra vacànza, el skipass e ‘l afito de i atréze par debàn, e chi ch’in a manco de dodeš i ciaparà duto par mèso prezio. “Sì co i šchie sote ‘l soroio de d’aušuda" ‘l è r’ultima ofèrta de ‘l "Superski Dolomiti", che ‘l dà un skipass co ‘l 20% demanco e outre boi šconte. Pède duto chešto, ci che ruarà ca ‘št’inverno i ciatarà anche ra šcores de šchie, chera de fondo, ra Guides, i Musèe, r’ofèrtes de r’Associazione Astronomica, un grun de gares de tròpe šport e … r’aria d’Anpezo. Dinultima, ci che ruarà co ‘l areoplano, sò a Venezia e a Treviso i ciatarà anche el "bus navetta", che ‘l menarà su fin daànte porta. Što servizio se ’l podarà aé solo de ‘l sabeda, dai 21 de dezènbre ai 5 de aprile.

Er.Ma.