benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Curta biografia dl sant ladin
scrit ai 03 October 2003 da les 14:08:09 da noeles

Persones

 

Ojöp Freinademetz, Fu Shen-fu - (1852-1908)


Dessoura sie inom scrit per cineis, Fu Shen-fu - L lingaz che duc capesc é l amour - Daite zacotant de fotografies dla vita dl sant

(if) Ojöp Freinademetz nasc ai 15 de auril dl 1852 a Oies tl comun de Badia. Al é vegnù batié tl medem di de sia nasciuda; da sia familia àl emparé na fede scempla, ma tl medem temp sterscia. Bele entratant si studes de teologia tl Seminar a Persenon àl metù man de pensé sceriamenter a les miscions foradecà sciche na poscibelté per sia vita. Al é vegnù consacré preve ai 25 de messel dl 1875 y spo él vegnù destiné a la comunité de San Martin de Tor, dret dlongia sia ciasa nadel, chilò s'àl tost davagné la stima y l respet dla jent dl post. Ma ence te chest temp ne ti vàl nia fora dl cef si pensiers per les miscions. Bele do doi agn da sia ordinazion se métel en contat con l pater Arnold Janssen, fondadour de na congregazion miscionara che deventa defata dedò ofizialmenter la «Sozieté dl Verb Divin».



De agost dl 1878 va Ojöp con l bensté de sie vescul tla congregazion de Steyl. Ai 2 de merz dl 1879 giàtel spo   la crousc miscionara y adum con n auter miscionar verbit, pater Giovani Battista Anzer, peiel via per jì tla Cina. Cinch edemes plu tert  desbàrchei a Hong Kong, olà che al resta per doi agn per se enjigné ca per la miscion che ti fova vegnuda sourandeda tl Shantung dl Sud, na provinzia cineisa con 12 milions de abitanc y con demé 158 persones batiedes.
 
Al fova agn durs con viadesc lonc y sfadiousc, n laour rie per formé les prumes comunités cristianes. Apeina che al é ste bon a mete su na comunité che fova bona da sté sun sies giames giàtel dal vescul l orden de lascé dut y da mete man te n auter post.
 
Ojöp capesc defata ite l'emportanza di laics te sia funzion de catechisc' per la pruma evangelisazion. A sia formazion dedicheiel trueps sforc y per ei ál metù adum n manual de catechistica tl lingaz cineis. Al se dedicheia tl medem temp adum con sie fre de congregazion Anzer, deventé entratant vescul, a la preparazion spirituala y a la formazion de prevesc cineisc y de d'autri miscionars. Duta sia vita é carateriseda dal sforz de deventé ence el n cineis, enscì scrìvel enfinamai a si familiars: «Ie ti vue ben a la Cina y ai cineisc; i vue morì amesa a ei y vegní sepolì anter ei».

Tl 1898 la àl empaieda soura con sia sanité per sie laour zenza paussa y dret de pecugna. Na malatia a la garsala y l mete man dl mel sech ova sforzé Freinademetz à fé na paussa y medié. L vescul y si fredesc spirituai ova fat prescion che al fajessa na sojornanza tl Giapon tla speranza che  al se remetessa sciche al toca. Defat, al vegniva derevers tla Cina ben paussé fora, ma nia dldut varì fora.

Can che tl 1907 l vescul mess fé n viade tl'Europa, mess Pater Freinademetz  sourantò l'aministrazion dla diozeja. Entratant chesta perioda fòvel rot fora na epidemia de malac. Ojöp sciche "bon paster" dova sia assitenza ai amalés y enultima s’ál  ence el amalé de malac. Al jiva atira derevers  a Taikia, senta dla diozeja, olà che al muer ai 28 de jené dl 1908. Al fova vegnù sepolì sot a la dodejeisema stazion dla Via Crucis y sia fossa é tost deventeda n pont de referiment y de pelegrinaje di cristians.

Pater Freinademetz à sapù amé  dassen la grandeza dla cultura de chel popul pro chel che al fova vegnù mané. Al á ofrí su sia vita per encundé l vangele, l messaje de amour de Chel Bel Die a l'umanité,  al à enciarné chest amour tla comunion dles comunités cristianes cineises. Al à animé chestes comunités a se daurì a la solidarité con l rest dl popul cineis. Al à entusiasmé trueps cineisc a na tel maniera che ai volù deventé miscionars anter sia jent, desche catechisc', fedei y fedeles y prevesc. Duta sia vita fova steda esprescion de sie slogan de vita: «L lingaz che duc capesc é l amour».


 

N valgugn retrac de sia vita:

 

Sia oma y si pere, Anna Maria Algrang y Jan Matie Freinademetz.
L pice Ojöp ova abú 5 fredesc y 3 sorous.
P. Ojöp Freinademetz a Persenon, l terz tla seconda linia da man ciancia - "La Santa Fede é la steila luminousa che ilumineia la nuet scura de chest mond"
P. O. Freinademetz (a man dreta) con l governadour Truppel de Tsintau (a mez) y l vescul J. Anzer (a man ciancia) tl 1903 a Yenchowfu

Una dles ultimes fotografies puech dant sia mort

Dant te, Signour, nos giubilon,
la gloria de ti Sanc laudonse,
Dilan te dijonse,  amour divin
che te nes as dé n Sant ladin!

Ojöp da Oies nos perion,
per sia interzescion potenta,
per sie ejempl d'umilté,
de pesc y de pazienza.

Sia ciasa a Takia

 

D'autri sic che rejona dl sant O. Freinademetz:


 
Liams emparentés
· Deplú sun l tema Persones
· Chier te noeles


L articul plu liet te chest tema Persones:
Laudatio per dr. Paul Videsott


Valutazion dl articul
Cumpeida mesana de oujes: 4
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.369 seconc