Conzert tla gliejia ploanala de Gries
Jan Batista Runcher, sonata per orghen en d-dur y Franz Comploi - "Maria tla revelazion" per solisc', cors y orghen
Jan Batista Runcher y Franz Comploi, doi musizisc' ladins de epoches desvalives se sporj te n conzert en juebia ai 2 de otober 2003 da les 20.30 tla gliejia ploanala de Gries. L conzert vegn organisé da la “Comunanza Ladina de Bulsan”. Chesta scomenciadiva é nasciuda da la colaborazion anter "La Corale" dla zité de Trent (sun l retrat) manejeda da Roberto Gianotti, l ensemble Zandonai, l grup de vidoles manejé da Giancarlo Guarino che tol ite i majeri strumentalisc' dla Region Trentino- Südtirol, la ciantarina Barbara Pichler da Bulsan y l organist trentin Stefano Rattini, anter l'auter organist titolar dla catedrala trentina de San Vile.
Janbatista Runcher se ova dé ju per plu de 40 agn con la vita musicala de Trent vegnian nominé maester dla mujiga dl Dom tl 1750, funzion che al à curì enfin a sia mort tl 1791. Denant òvel laoré ence a Dala te Tirol, olà che al ova frecuenté l ginase di Gesuic y spo òvel a Aunejia scrit toc de mujiga sacrai desvalifs y ence deplù conzerc strumentai. Baudì nen él resté de chestes mujighes ben pueces, i toc che vegnirà prejentés é la soula testimonianza dles dotes dl artist ladin. Dal pont de veduda stilistica pò sies operes vegní atribuides al preclassizism, chela perioda de transizion che pian via da la entreciadura de oujes polifoniches, tres l’omofonia domineda da la melodia enjigna ca l troi a la maturité, raprejenteda dal classizism vieneis.
De Runcher vegniràl prejenté la "SINFONIA" en re maiour per cors y vidoles, l "DIXIT DOMINUS" per solisc', cors y orchestra y la "SONATA" per orghen en d-dur tla trascrizion de Clemente Lunelli che à curé la stampa de duta la opera de Runcher. Franz Comploi é n autour de nosc temps, nasciù a La Val, al ensegna pro l “Mozarteum” de Salzburg y pro la “Ledia Université de Bulsan”, emplù él organist dl Dom de Persenon. L oratore per sopran, cor y orghen “Maria tla revelazion” sotolinieia con gran abelté l grandious test ladin de Iaco Ploner. Da la forza tamben ritmica che armonica dla persecuzion di credenc da pert dl dragon y dla bisca pàssen a la bela Ave Maria te n contrast musical de gran fazion.
Does propostes musicales donca desvalives, ma dret interessantes, liedes adum da la provegnenza di doi autours da chela tera afascinanta y rica de poesia raprejenteda dal mond ladin.
PROGRAM
Barbara Pichler, soprana
Stefano Rattini, orghen
Ensemble Zandonai - "La Corale" dla zité de Trent
diretour Roberto Gianotti
Jan Batista Runcher - sinfonia en d-dur per cor y vidoles
Allegro
Andante sempre piano
Allegro
Jan Batista Runcher - DIXIT DOMINUS per solisc', cors y orchestra
Dixit Dominus Allegro
Judicabit Adagio
Conquassabit Allegro
De torrente Moderato
Gloria Adagio
Sicut erat Allegro
