La ''Quotidiana'' à complì i 5 agn
scrit ai 06 November 2002 da les 11:55:18 da noeles |
|
Ala va tres damiec do n troi lonch y sfadious
La Quotidiana, l foliet da vignidì di Ladins dla Svizra, à complì chisc dis i 5 agn. Al é vegnù metù en pé dl 1997 y l troi enfin al 2002 é sté scialdi lonch y sfadious, ma al à paié la mueia . La Quotidiana à devent les prumes dificoltés Bele ti agn 80' sentìven tl Grijon l debujegn de avei n foliet da vigni di tl lingaz rumanc, ma al á volù ester agn y discuscions longes enfin che l projet é madurì tl concret.
Al scomenciament dl 1997 ti él garaté al president Hanspeter Lebrument dla ciasa editoura "Südostschweiz" te n colp de fortuna y sorpreisa de convence duc y de uní feter dutes les zaites locales/de valeda rumances che ova bendebot de tradizion: La Gasetta Romontscha (dal 1857), le Fögl Ladin (dal 1857), la Casa Paterna (dal 1920), la La Punt (dal 1957) y ultimamenter La Nova BT (dal 1994). Chestes compariva per l plu doi iadesc a l'edema y al fova samben rie da se destaché y pié via danuef. Tl medem ann à ence la Agentura da Novitads Rumantscha sot la direzion de Giusep Capaul metù man sia ativité. Propi chesta ti à dé n sostegn podoul a la picera creatura. La redazion é vegnuda sourantouta da Martin Cabalzar, ex-redadour dla Gasetta Romontscha, dla Surselva. Aldò dl editour Lebrument à la scuadra redazionala laoré dret ben y soura les aspetatives te chisc 5 agn y aldidancuei ne pénsen nience plu a la dé su, a desvalivanza di prums temps. Al vegn reconesciù che d'importanza fondamentala é steda dampertfora la creazion dl'Agentura da Novitads Rumantscha che conzepesc di per di les edizions deberieda a la redaziun. L foliet vegn fora 5 iadesc a l'edema. Paroles d'aodanza y encorajament é vegnudes dal Govern Ciantonal tla persona de Claudio Lardi y dal secreter dla Lia Rumantscha, Gion Antoni Derungs.
|
| |
Cumpeida mesana de oujes: 3
Oujes: 1
|
|
