Plan dla contreda nuef per S. Crestina
La pruma comiscion per la sconanza dla contreda à dé pro l plan nuef per l comun de S. Crestina.
(osp) Deberieda con l plan per S. Crestina él ence vegnù dé pro chel per l Vigljoch tl comun de Lana y chel per Moritzing te chel de Terlan. Te Gherdeina végnel metù sot a sconanza l raion entourn la mont de Pic. L plan vedl per la sconanza dla contreda per l comun de S.Crestina fova vegnù fat tl 1984 y enscì fòvel sen gran ora de l laoré fora da nuef. Chest bele davia che entant se àl mudé les diretives y les normatives sun la sconanza dla natura y contreda. L plan dla contreda nuef respeteia enscì l plan urbanistich, les diretives per la projetazion y l plan LEROP - diretiva per dut Südtirol. Sen vegnirà i plans manés inant ai comuns per i publiché y per tò ite valch touta de posizion. Do chest vegnirài ciamò n iade metù dant al govern provinzial per n bensté definitif.
L enseriment dl gran raion entourn a la mont de Sourasas y de Pic (2363 m) tl plan dla contreda de S.Crestina é la novité plu clera di adatamenc y mioramenc de chest plan che fova vegnù fat dant belau 20 agn. "L raion con si pres y bosc da mont é n post de gheneda sciche puec d’autri te na valeda tant turistica" enscì végnel anunzié tl scrit dl plan dla contreda nuef. Al é vegnù dé pro de stravardé de plu posc' particolarmenter naturai che an conesciova bele y ence de nuefs sciche l Pre dl Mandl sun Mastlé. Vedù dantfora él ence de mete confins nuefs al parch natural Puez-Odles entourn a la piza de Seceda per l taché adum con la mont de Resciesa che fova vegnuda touta ite tl parch natural l ann 1999.
