benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Prejentazion di candidac a les lites provinziales
scrit ai 23 September 2003 da les 12:08:36 da noeles

Politica

 

10 agn de Lista Ladins

Gran festa ai 27 de setember a Corvara - al sona "die Ladiner" - La mendranza ladina é spizoleda su, sceben te n terac plen de peres

de Umbert Cians

(if) Con l meteman dla legislatura nueva complesc la Lista Ladins si prums diesc agn de prejenza politica. Ciamò dassen joena, de mendra eté, ma ala aspeta de podei cresce, de abiné su tres de maioures esperienzes, de podei ruvé ite deplen tla vita politica y de vegní reconesciuda a livel giuridich y de partí. Per recordé chesta realté vegniràl fat festa en sabeda che vegn a Corvara da les 16.00 inant. Te chesta ocajion vegniràl prejenté tl salf dles manifestazions de Corvara l program y i candidac dla Lista Ladins per les lites provinziales de chest auton. Dut l staff dla Svp à depierpul bele prejenté sie candidat ladin, Florian Mussner en vender ai 19.9 sun l Jouf de Frera. Anter si ponc dl program porté dant da Mussner ti à plajù a Durnwalder souradut chel che reverda si festidesc per l problem dla deprescion y di suizides. Mussner volessa se dé ju per cherié n mond plu uman, olà che ence les persones de valuta, competentes y scichedes possa se realisé y se sté ben.



Dessegur cosses interessantes, beles da dì dant les lites, belunfat spo chela che é la realté. Bonamenter pensòvel a les 843 persones che é judes da el, ma dessegur nia a les persones competentes che ti mostra su sies contradizions dandaldut a livel de cultura y de lingaz y sia puecia o deguna colaborazion con la Lista Ladins. Cotant plu bel sce al essa dit: "Al é lerch per duc, medret che i cefs se vejine". Degugn ne dij che i litadours ladins dla Svp ne sie nia ladins, ma ai mostra su puecia coscienza y ai stà massa sot. Percie che reverda la colaborazion, la coscienza dla comunité ladina, sia autonomia, la unité interladina, é dessegur plu daverta la Lista Ladins. Chest depen ence dal fat che ela é plu ledia y n'à nia bria d'avei dantfora l'autorisazion de autri. Pro la manifestazion da Corvara podaràn ence audì na persona critica, zenzauter competenta, ma ledia te sies minonghes: Hans Karl Peterlini, redadour chef dl sfuei todesch FF che vegn fora n iade a l'edema y dl foliet nuef todesch da vigni di "Sudtirol 24h". Al conesc ben la situazion de Südtirol y al pò ence avei les informazions da sie fré parlamentar a Roma, Oscar Peterlini. Sies idees y si pensiers dess audì y conesce ence chi dla Svp ladina: al sarà na scola de politica y de encorajament a se bate da ladins y no da todesc, tl respet di grups etnics. Bonamenter fajaràl ence vedei ite les contradizions dla Lista Ladins, si fai, sies limitazions. Deguna poura o marevueia, an à tres da emparé. Les persones critiches fej gonot mel, ma ales deida jì inant. Avei l coraje de les lascé rejoné é bele n segn de daurida al nuef y de volenté de mioré. A Corvara audiràn spo Carlo Willeit, vizepresident dl Consei provinzial y regional, che fajarà na sintesa di ultims 5 agn y al darà n cheder dla politica dl davegní. Diesc agn dassen riei y de gran laour che à vedù cresce la coscienza ladina y souradut l respet di autri grups etnics te nosc confronc. Les truepes mozions portedes dant dal consiadour Carlo Willeit à jové. La mendranza ladina é spizoleda su sceben te n terac plen de peres y con n grumon de dificoltés per souravive. Ma i son en vita y la vita jarà inant. Al tocarà a Giovani Mischì, president dla Lista Ladins, porté dant l program dl moviment ladin che garantesce chesta vita, sciche i trois plu sauris y segurs da jì per ruvé su alaut. L program vegnirà rejoné fora anter duc i prejenc tl salf, a na moda ch'al sie na cossa sentida da duc, na creatura dla basa ladina y no aconsieda da d'autri per sie interes. Samben ne manciaràl nia l pensier per chi da souramont. L'unité di Ladins é nosta forza. Anter n pensier y l auter, anter na discuscion y l'autra vuelel ence ester valch de lesier, da la orela curta. A chest pensarà l grup musical "Die Ladiner", oramai conesciù a livel europeich. Duc é inviés da vegnì.

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.379 seconc