Na via nueva tl Grup dl Larsech
scrit ai 15 September 2003 da les 11:57:18 da noeles |
|
Gino Battisti deura na via nueva atrezeda Ala à inom "Les does Touses" - a recordanza di 100 agn dl refuge Gardecia
de Claudio Gabrielli
 (if) Ai prums de aost dl ann passé ova l meinacrep Gino Battisti, 58 agn, adum a Giovanna Inzigneri y Tiziana Gabrielli entitulé na via nueva sun l Larsech per recordé i 100 agn dla utia da mont Gardecia. Ence chest ann tl medem di, con les medemes compagnes y la medema pascion, demé con n ann deplù sun les sciables, ài volù fé ciamò zeche da nuef su per i creps, sun l Larsech che pò vegnì conscidré sie regn, olà che al à daurì bele 100 vies. Desche na picera “patria” fata de spic, de autezes, de toei che ence sce an i conesc da n cianton al auter, conserva empò secrec nuefs: pareis y semenes per mesuré sia capazité y renové sia pascion per les montes.
Sun l retrat: l meinacrep Gino Battisti
Desche apontin la via nueva che Gino à volù clamé via de “Les does Touses” en onour a les alpinistes che l à compagné te chesta scomenciadiva. N percurs plu “aieré”, scriv Gino Battisti te sia relazion scrupolousa, che se daverj sun na pala anter l Ciampanil Gardecia y l spiz clamé la “Odla dla utia da mont”. N percurs da temei de categoria D- , 3° y 4° degré , lonch 160 metri sun l cianton a man ciancia, desche n ecuiliber anter crep y ciel: desché n balcon sun la Val dl Vaiolet y Gardecia. An adora 40 menuc da jì a pé da la utia da mont Gardecia per ruvé ai piesc dla Via de les Does Touses. An va empruma sun la via dles Scaletes per valch menut y dapò méssen jì a man ciancia enchin a ruvé al pe di creps anter la Odla y la Pala Patech. An à messù tré do 5 iadesc la corda per ruvé sun la piza te n'ora y 45 menuc; 3 cordes doples àl volú ester a vegnì endò ju dai glerons. Da chilò enfin ju da pe n curt percurs sun i crepac. Endut n 'ora per ruvé endò ju al Gardecia. La via nueva é resteda atrezeda per chi che volessa jì su.
|
