Daurida dla ferata „Troi dla Pesc“ ai 14 de setember
Ala conduj fora per la cresta anter i comuns de Mareo y Ampez
Chesta semena vegnirà daurida ofizialmenter en domenia, ai 14 de setember 2003 tl cheder de na picia festa pro la utia Gran Fanes. Duc i interessés arà en domenia l’ocajion de fé la via ferata acompagnés da n meinacrep. Per chesta ocajion vàl debujegn de se lascé noté su enfin en vender, ai 12 de setember. Dles vies sun les crestes dles montes che é vegnudes fates entant la pruma gran vera é l Troi dla Pesc una dles plu beles. Dant 90 agn fòvela vegnuda enjigneda da les trupes dl'Austria per ti ruvé plu permez a la linia dla front da l'autra pert dles Tofanes, soura la Val de Travenanzes.
I Parcs naturai Fanes-Senes-Braies, Dolomites d´Ampez en colaborazion con l'assoziazion turistica de Mareo y i meinacreps dla Val Badia y da Cortina à enjigné ca sen da nuef l troi. La via ferata é vegnuda fata da nuef tl raion de Cresta de Valon Blanch al Mont Ciastel y fora per les Pizes de Fourcia Rossa. Duc i interessés che volessa fé la via ferata acompagnés da n meinacrep dess se lascé noté su enchin a n vender ai 12 de setember 2003 al numer de telefon 0474-50 61 20 o 0436-22 06. Per les Pizes de Furcia Rossa se encònten da les 7.00 a Pederü o a la Capanna Alpina/San Ciascian. Chi che volessa fé la Croda dl Valun Blanch se enconta da les 7.00 al Ponte Felizon. La escurscion finarà via con l'enconteda con aperitif pro la utia de Gran Fanes. Luciana Palla da Fodom fajarà ilò n pice ressumé dles tapes de majera importanza dla gran vera. Duc i vijtadours, ence chi che à na lizenza per furné, é te chesta ocajion priés bel de ji a pé enchin sa la utia de Gran Fanes. Tl caje de rie temp vegnirà la manifestazion sburleda a la sabeda do, ai 20 de setember 2003. L program ne vegnirà nia mudé.(ops)
