Mussner blocheia n contribut conzedú a la Union di Scritours Ladins Agacins

Al dij: "L bensté dla Consulta ne é nia oblient per la Jonta provinziala"

Con "gran marevueia" à enzai l assessour per la scola y cultura ladina tout a conescenza - enscí te n comunicat dé fora encuei da seira - che i media, plu avisa l Mittagsmagazin todesch encuei,  ti á trat dant che el tegn zeruch arbitraramenter n contribut cultural a la Union di Scritours Ladins Agacins, ence sce al é n bensté de ti l dé dla Consulta Ladina. L import fej fora 5.000 euro. Mussner recorda te sia reazion, insciautrí da les domandes dl jornalist todesch, che l bensté dla Consulta Ladina ne é nia oblient y che la Jonta provinziala tol la dezijion. Al ne dij nia ciunes che é les gaujes per sie astilament, ma se limiteia demé a dí che "les domandes pò ence vegnì cialedes do plu avisa". Praticamenter pò la Jonta fé cie che ala vuel, la dezijion dla Consulta ne conta nia.  A defene la Union tla Consulta fòvel l president dr. Carlo Willeit. Mussner ne vuel nia respeté la delibera dla Consulta. 

"La Consulta Ladina à demé da dé ju sia minonga sun les domandes y ne pò nia dé pro l contribut, davia che ala à demé na funzion aconsienta. Al é l dovier dl govern provinzial de dé pro spo les domandes de contribuc. Al pò ester dla medema minonga dla Consulta, ma al ne mess nia ester enscì." Chesta é la curta spligazion de Florian Mussner.

La Union Scritours Ladins Agacins redazioneia la Plata Ladina sun l Alto Adige y dlongia ence chest sit www.noeles.net, doi organs che á critiché plu outes l assessour y dut entournvia, critiches che ne vegn do l mote nia toleredes. La liberté de stampa vel demé enfin che al ti vegn fat a scusa.