Stipendiums: l ultim di sarà juebia ai 2 de otober 2003
Al resta demé plu pueces edemes de temp per i scolés dles scoles d’ert y scoles secondares dl II. livel per dé jù les domandes de contribuc a la Provizia per l ann de scola 2003/04.
(osp) Les domandes pò vegnì dedes ju te scola o tl ofize a l'assistenza scolastica y universitara. Dutes les scoleres y i scolés che viv te n comun dl Südtirol o che per rejons de stude à sposté sia residenza te Südtirol pò fé domanda per i contribuc. Per chest ann de scola vegniràl dé enchin a 2.719 Euro. Chesta soma ti speta a scoleres y scolés che mess entant l temp de scola vive destachés da sia familia y che à n davagn (manco les speises) enchin a 1597 Euro. Per scolés che é demé entant l di demez da ciasa vegn la soma mascima smendrida dl 30 percent. Duc i autri pò giaté n contribut de 309 Euro. La soma mascima dl davagn zenza les speises é per l ann de scola 2003/04 vegnù metù a 17.850 Euro. I formulars per les domandes per stude é da giaté ti comuns, tl ofize provinzial a l'assistenza scolastica y universitara a Bulsan y ti ofizes de consulenza de laour. En plu é i formulars y les informazions ence sun les plates provinziales dla rei zivica sot a la miscion www.provinz.bz.it/schulfuersorge-berufsberatung/4001/schulfuersorge/oberschulen.
Pro les domandes méssel ence vegnì dé ju na copia nia autentificheda dla declarazion dl davagn 2002, per l ann 2001. Sce al vegn dé ju i formulars sun plates singules, mess vigni plata vegnì sotscrita. Chi che mana documentazions y declarazions per fax, mess ence mané empera na copia dla cherta de identité. Les domandes pò vegnì dedes ju tla segreteria dla scola o scenò dretamenter tl ofize per l sostegn scolastich tla streda Andreas-Hofer 18 a Bulsan. Chi che giata enchin ai 2 de otober na letra dal ofize competent che la domanda ne fossa nia a post, à ciamò does edemes de temp per les comedures o per dé ju valch document. La Provinzia ciala dò a estrazion sce les informazions dles domandes é ben dretes. Informazions plu avisa pò vegnì damanedes dretamenter pro ofize a l'assistenza scolastica y universitara.
