Studentes de romanistica en vijita tla Ladinia
Dai 1 ai 13 de setember él studentes dla université de Münster en vijita tla Val Badia
Per les studentes de romanistica y sia professoura Sylvia Thiele vegn a ester chesta na bela ocajion per se confronté dal vif con la realté ladina te nosta valeda. Chilò àles la poscibelté de conesce miec l lingaz tolan pert a n curs de ladin tegnì da Daria Valentin. En plu - per podei ti ciutié plu damprò a la cultura ladina - él vegnù organisé na vijita al museum ladin Ciastel de Tor y a la senta dl'Université ledia de Bulsan a Persenon. Vedú dantfora él ence na pert leterara, olá che n valgugn autours ladins ti liejarà dant sies rimes. Per se imaginé miec les ordidures dles liejendes vegniràl fat na jita te Fanes olà che an sent chel ambient y aier magich che vegn dant tles liejendes. Un n di tolará les studentes ence pert a n curs da cujiné speisa ladina a Sotciastel. Tl cheder de chesta vijita à l Istiut Ladin "Micurà de Rü" organisé adum con l Istitut Pedagogich Ladin y l seminar de romanistica dla "Westfälische Wilhelms- Universität Münster" ence n seminar soura la didatica dl plurilinguism tegnì da la professoura Sylvia Thiele.
L seminar sarà entratant l domesdì dai 8 ai 11 de setember da les 15.00 a les 17.00 tl Istitut Ladin a San Martin y é davert a duc. Al vegnirà prejenté informazions teoriches sun l aprendiment de de plu lingac y i conzec dla Germania soura l ensegnament de doi lingac tl lizeum. L seminar vuel ester na ocajion per prejenté y paredlé esperienzes desvalives per cie che reverda i problems concrec tl'organisazion y ti fins dl ensegnament te de plu lingac tla Germania y tla Val Badia. Chesta é na tematica scialdi interessanta dantdaldut per maestri/maestres (LS:if).
