benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Da la Comunanza Ladina a Bulsan
scrit ai 07 September 2003 da les 06:52:46 da noeles

Cultura

 

Enconteda de fin d'isté y viade tl Friul

Chestes é les does proscimes iniziatives dla Comunanza Ladina a Bulsan


La Comunanza Ladina a Bulsan envieia duc i Ladins a passé n dí en bona compagnia sun Kohlern (Colle) soura Bulsan en domenia, ai 14 de setember 2003. Chest é l program via per l dí: dantmesdí, per chi che á vueia de fé doi varesc, él la poscibelté de fé na picia spazireda enfin sun les "Schneiderwiesen". An se abina da les 09,00 da doman pro la furnadoia de Kohlern (Colle) y za. te na ora rúven sun les Schneiderwiesen. Vegnan derevers stórjen pro tla "Baita" dl comun per la marena che vegn ofrida debant. Domesdí vegnirál fat juesc per chi dla scolina, per chi che va bele a scola y ence per i gragn. La festa vegn ence metuda a jí, sce al é rie temp. Per ruvé sun Kohlern (Colle) pòn se anuzé dla furnadoia che peia via vigni mesora (da les 8.00 a les 12.00 y da les 13.00 a les 19.30). A duc chi che ruva da les 09.00 pro la furnadoia ti vegnirál paié la cherta da la Comunanza. Per organisé miec la festa fóssel d'utl che an se anunziassa dantfora al numer de telefon 0471/286103. Sun l retrat: la bela zité de Cividat/Cividale tl Friul con l pont dl malan, una na etapa dl viade.



Viade tl Friul

Bele da d'auton dl ann 2001 ova la Comunaza Ladina organisé n viade per dé l'ocajion ai sozes de vijité na pert dl Friul y plu avisa i paisc de Rigolat, Tumiec, Bordan, Vencion y San Denel tla pert auta, tla Cergnia, y tla pert colinara (pedemontane) dl Friul. Ma l Friul é n gran raion y chest auton án enscí pensé de jí plu inant y vijité na autra pert dl Friul storich che tol ite i paisc de Acuileia y les piceres zités de Cividat/Cividale y Glemone/Gemone tla pert zentrala-orientala dl Friul. L program veid dantfora de pié via da Bulsan ai 20 de setember da les 8.00 da doman con n bus dla Firma Mahlknecht de Steinegg da la senta dla Comunanza, Str. Roen n. 6, jan ju per la Val dl Adesc sun l'autostreda enfin a Trent per ouje spo devers la Valsugana enfin a la zité de Palme/Palmanova tl Friul. Da chilò inant él do puec km Acuileia olá che an ruvará da les 13.00, adretora per jí a marené al Restorant Patriarchi y conesce ence i miours vins furlans desche l "Refosco dal peduncolo rosso" o l "Tocai furlan". Da les 14.30 él vedú dantfora la vijita a la gliejia de Acuileia y al museum paleocristian con sia area archeologica romana olá che an po vedei i resc' de ciases romanes y valgugn fonc con mosaics romans. Da les 17.00 preveiden de ruvé a Cividat/Cividale, vedla capitala dl Friul plena de storia di Langobards y di Francs con de beles stredes y ciases medievales. Chi che vuel podará vijité l "Museo Archeologico Nazionale" (mostra langobarda), l Templet (Tempietto) Longobard y l Museum cristian dl dom y l pont dl Malan. Da les 19.30 ceina y sté souranuet tl Hotel Roma. L dí do piará via l bus entourn les 10.00 y an jirá sun la streda dl vin passan per i paisc colinars de Faedis, Atimis, Tarcint y Dartigne per ruvé a Glemone/Gemona entourn les 10.30. Chilò án spo la poscibelté de vijité l zenter storich adum con l assessour al turism signour Costantini Antonio. Da les 12.00 marena tl zenter storich al restorant Al Falotto che pieta derzedes tipiches furlanes y ciargneles. Da les 14.00 peien endò via devers Tumiec/Tolmezzo y For Davuatri/Forni Avoltri y an ruvará entourn les 15.00 a Plodn/Sappada olá che al é programé na curta architeda per ti cialé a chest vedl paisc todesch con sies beles ciases da paur plenes de colour. L iade va inant per S. Stefan de Ciadoura, Auronzo y lech de Misurina olá che al é prevedú n'autra paussa de za. 1 ora. Da les 20.00 arciaseda devers Bulsan con anterite na curta architeda a Bornech per se destré les giames. L priesc dl viade é de 55,00 € y da s'anunzié dantfora él al numer 0471/952197 (Lezuo Ivan).

L president

Ivan Lezuo


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.361 seconc