San Ciascian giata does encroujedes a rodela
Ales jiva debujegn per ti tó l sbunf al trafich sun la streda de sviament y fé les encroujedes plu segures y comotes
Enier lunesc ti él vegnù sourandé da pert dl assessorat ai laours publics a la firma Schiavo da Sterzing la enciaria da mete a post les does bources (les encroujedes) che colieia l paisc de San Ciascian con la streda de sviament al scomenciament y a la fin dl paisc. Trames les bources vegnirà tramudedes te encroujedes a rodela. I laours dess vegnì portés a termen anter 7 meisc. Sun l retrat: la bourcia de San Ciascian.
L cost preventivé amunteia a 568.697 euro. Les bources dess deventé plu saurides y dantaldut plu segures per l transiament. L plan veid dantfora does encroujedes a rodela, respetivamenter una a l'entreda dl paisc y l'autra a la fin dl paisc, entramesdoes con n diameter de 30 meters. Tres chestes does rodeles vuelen demendrì l sbunf dl trafich y asseguré n transiament plu comot sie per jì tres l paisc che per l svié, zenza tegní su l trafich. L termin metù a la firma Schiavi per scluje ju i laours é de 7 meisc, ma sburlan ite na paussa entratant la sajon da d'invern. I laours de enjignament dla streda vegnirà perchel ruvés en autra outa da d´aisciuda. En gaujion dla sourandeda di laours a San Ciascian fòvel ence prejenc l ombolt dl comun de Badia Ugo Dorigo, l assessour ai laours publics dl comun Paul Rudiferia, deberieda ai esperc responsabli desche l diretour de partizion inj. Marco Massella, l diretour de partizion inj. Italo Furlan con si colaboradours inj. Gustav Mischi (da Lungiarü) y l geom. Pinzan, che sarà i responsabli per la realisazion de chest laour. Tamben prejent fova l projetant dr. inj. Carlo Corona de Maran che à sport clarificazions en cont dl projet en general.
(fontana: osp/LS: is)
