benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La storia de Fodom
scrit ai 01 September 2003 da les 12:55:49 da noeles

Cultura

 

"Sce chest se clama nié la storia!"

Resposta de Lorenzo Soratroi al articul de Ivan Lezuo, na critica desche i fodoms se astila con sia storia: enier Kaiserjaeger, encuei con la pluma da Alpins

de Lorenzo Soratroi

L articul lonch de Ivan Lezuo entitolé “E chela la storia fodoma ?” azica de segur n argoment de peis. Chi che se interesseia da agn de storia (y ta Fodom ései ben puec), sa che massa daspes (gonot) la storia fodoma y en particolar chela dla Pruma Vera, vegn desmentieda, strabaceda, mescededa. Fosc él propi l destin de na tera “deventa” (concuisteda) che ne ova deguna intenzion de mudé aministrazion, ma che, a destin suzedù, é vegnuda sotmetuda da la politica de “talianisazion”. D’autra pert, sce i ti cialon a la storia, é Fodom tres steda na val de confin, sie ai temps sot l Imper Asburgich che plu tert pro la Talia, con dut chel che é viadedò: vegnì consciderés “talians” da na pert y “todesc” da l'autra. La popolazion fodoma à tres messù core sun n fil sotil: chel che la obliova y la oblieia dutaorela, de tegnì relazions istituzionales con les aministrazions da olà che ala depen y da l'autra pert de mantegnì i contac con cheles comunités pro cheles che ala é tres steda lieda. N sforz dopl a paredl con  d'autres realtés nia de confin.  Sun l retrat: L Col de Lana, enlaouta ciamp de batalia anter todesc y talians, i ladins fracés anterite, encuei zop ideal per jí con la roda da mont.



Chest nia per defene o giustifiché ceze o valgugn, ma percie che chesta condizion vegn desmentieda massa daspes dapert de chi che osserveia o giudicheia da defora. Pervia dla conferenza de Dalla Rosa ne me “sbregasse ie nia i guanc” desche Caifa tl Sinedre. Chela é na teoria de n studious. I fodoms che fova ilò en chela seira é dut jent interesseda de storia y sa de segur co giudiché con obietivité, zenza se desmentié les raijes storiches y culturales de Fodom. Che l argoment ae spo puech o nia abù da nen fè con l Col de Lana, de chest sonsi ence ie a una. Ma tant de robes végnel pa fat encuei, zenza l respet dla storia y nia demé ta Fodom? Per resté tla val bàstassel jì a vedei chel che vegnirà fat su per Col de Lana con l projet Interreg, finanzié ence dal Comun, per varenté les trincees y les semenes de vera. Degun studious fodom ne é vegnù interpelé o fat intervegnì da pert dl’Aministrazion de Comun per cialé soura che al vegne tegnù cont dla storia fodoma. E, metede ben averda! Te chest projet spen l Comun l ecuivalent de n ann de couta ICI !!

Ma i fodoms ne vuel de segur nia desmentié la storia. Fosc se desmentia l autor dl articul dutes les beles publicazions dla storiografa fodoma Luciana Palla, che plu o manco vigni fameia (familia) à te ciasa. Sce chest se clama nié la storia !!! Per via dl articul zité, che descorova di alpins, responi percie che i son vegnú clamé en gauja. Al me desplej, ma i ne veid nia de mel sce i alpins da Fodom se dà da fè per raprejenté nosta val pro de tel zerimonies. Che chest ann sun Col de Lana per l prum iade àn vedù ence na raprejentanza de Kaiserjäger. Al é sté n event de segur ezezional y dret simbolich. Guglielmo Gabrielli, desche ex Capogrup di Alpins da Fodom, à dagnora dit:” Per la storia, i alpins ne essa nia da cie fè con l Col de Lana.” Ma sce al ne fossa nia ei che se cruziassa dla zerimonia, di trois, dla capela, de dut l rest ? I ne veide nia ite percie che un che à l ciapel da alpin, messe per forza s’avei desmentié la storia fodoma o che al ne posse nia ester ladin. Ie l é ence scrit. Sce n auter ann, a Lienz, ciafieiel da jì ence valgugn con l guant da scizer, miec ciamò. I alpins ne arà de segur nia da dì. Coche al ne sarà nia da dì sce valgugn, desche via en Ampez, volessa endò mete en pé la sezion fodoma di scizeri, che fajova pert dl batalion “Enneberg”.



 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 4
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.357 seconc