benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Fodom: no te desmentié de tia storia
scrit ai 26 August 2003 da les 14:47:57 da noeles

Cultura

 

Les contradizions tla storia fodoma


Enlaouta fodoms Kaiserjäger, encuei travestis da Alpins


de Ivan Lezuo

 (if) Ai 4 de aost tl salf di congresc de Reba à l scritour y alpinist, Dalla Rosa tegnù na conferenza soura la gauja che à sburlé i talians a s’en jì dal Col de Lana. L obietif sotman é sté chel de volei la reabilitazion de Luigi Cadorna, do cie che al é suzedù a Ciaurêt/Caporetto (i adoron l inom per ladin-furlan). Teoria zenzauter enteressanta, demé che an ne veid nia coche chest podessa daidé a valorisé l Col de Lana, y ciamò manco la storia fodoma. Na storia ladina y tiroleisa (tant puech conesciuda te Fodom) lieda dassen al Col de Lana y a truepes de autres montes entournvia. Da la ousc dl Dalla Rosa endere me someiel de avei capì che ai talians ti sàl ciamò aldidancuei massa sclet cie che al é suzedù do la desfata de Ciaurêt y al vegn fat te n iade l tentatif de auzé su i meric dla armeda taliana (cis chi de Cadorna) entratant la pruma vera, sciche l Dalla Rosa enstes dij che la Talia mess na bona outa jì con l cef aut. Da me enfora fòssel sté ben fat, sce ai essa envié ence de autri storics che essa podù fé plu lum sun la vera sun l Col de Lana y entournvia da na autra veduda, fosc plu destacheda y manco emotiva.



Ajache l Col de Lana ne é nia demé na mont taliana. Dal revijionism dla storia taliana y da la restaurazion dl onour dla Talia ne à la identité fodoma dessegur nia da davagné. Enfin che la storia fodoma vegn asconuda via - tamben te scola che dant ai foresc' che à ence l dert de conesce miec la storia dl luech - ne podonse nia se fé de marevueia, sce la identité culturala y la conescienza storica va a se perde tl temp. Sce i volon per n iade valorisé valch, fossa chest propri nosta cultura, storia y nost bel lingaz. Cis la storia fodoma meritassa plu creta da pert de duc, ajache ela é dassen rica dal pont de veduda sozial, economich, cultural y truep de auter. Do la minonga de Dalla Rosa él sté na vera de agrescion da pert dl'Austria, entratant che i talians à messù se defene. Na teoria dret debla, sce i conscidron che i austriacs tl scomencé dla vera ne fova sun l front talian nia enjignés. Perdret é la gauja prinzipala dla vera l imperialism che fova da ciasa te dut l rest dl Europa te chisc temps. Tl pice liber "Col di Lana - La grande guerra a Fodom 1914 - 1918" de Guglielmo Gabrielli, dé fora a la jent en ocajion dla conferenza, végnel descorù enchinamai de "Vittoria finale" con la "V" grana. Al me vegn da pensé che per l scritour él valch de emportant, de valour simbolich dret aut. I savon duc che descore de deventa (te na vera) vuel ence dì descore de desfata.Te chest cajo, sce i volon ester coerenc, de na vera perduda dai austriacs, dai tiroleisc, dai fodoms. Per n iade na "Desfata" con la "D" grana. Sce an podessa n iade se damané, cie che la storia de Fodom é, de cie storia che ai vuel fé pert, cie storia che i volon sentì. Na resposta che desmostra endò n iade la pesima y la incoerenza storica de trueps fodoms, i la podon ence vedei da n articul vegnù fora sun la plata di Ladins tl Alto Adige dl 5 de aost, olà che an pò lieje: "I raporc anter Alpins y Kaiserjäger te chela ocajion (a la comemorazion a Lienz ai 17 de auril) é tost stés bogn, tant che ence les autorités locales é stedes contentes de avei vedù desfilé adum chi ciapiei con la pluma che dant da nonanta agn se sclopetova decontra sun Col de Lana". I fodoms va n iade a raprejenté i Alpins a Lienz sciche segn de pesc, can che i fodoms enstesc n iade à combatù sciche Kaiserjäger y Landesschützen. N iade va i fodoms - sciche Alpins - "a se arconcé ite" con chi che ei ova combatù n iade sun la medema pert. Al someia che l alber dla storia fodoma sie fora de nia mudeda, nia demé les fueies, ma ence les raijes, entratant che duc i autri é restés liés a sia cultura, sia tradizion y sia identité. L articul va inant: "N segn che i temps muda, de na coscienza nueva che se fej inant, aldessoura di confins y che ciala endò a la storia con n plu obietivité". Chesta coscienza nueva ne à dessegur nia porté plu obietivité, ma ala à fat sci che trueps fodoms à metù man de desmentié via sia storia

 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.385 seconc