Les Regoles de Ampez à debujegn de vegnì revijionedes

9 regoliers se enconta edema per edema per ti cialé tres a les regoles y cialé de les atualisé - Does propostes da denant fova vegnudes desbutedes

de Ernesto Majoni

Tla Regola de Ampez végnel rejoné vignitant di "Laudes" (dles rejons dla Regola de Ampez) y dl bujegn de i mete en orden. Ultimamenter àn endò rejoné do la "Foula Granda" di 27 d’auril, olà che al é vegnù fora che al fossa ora soneda de comedé i "Laudes" dla Comunanza y dles Regoles Basses. Enscì à la Deputazion dezidù de mete adum na Comiscion che proe de scrive ju danuef i Laudes: does femenes y set oms de bona volenté à azeté de tò tles mans i Laudes y de cialé sce an pò i adaté saurì ai temps che se muda. I agn passés fòvel bele prest vegnù enjigné does propostes de Laudes nuefs, una dl 1997 y una dl 1999: dutes does ne n’é endere nia vegnudes azetedes dai Regoliers, sen vuelen proé danuef. Tres les desposizions dl "laudo" (l statut dla Regola/Comunanza de Ampez) végnel regolé per menù l'aministrazion di bens comuns, di bosc y di pascui de Ampez. Les Regoles de Ampez é partides ite te endut nuef Regoles do raions, does "Regoles Autes" (Lareto Auta y Ambrizola) y te 7 "Regoles Basses" (Zuel, Campo, Pocol, Rumerlo, Cadin, Ciave, Lareto Bassa, Mandres y Fraina).

I Laudes nuefs arà da daidé a aministré les Regoles per almanco vint o trenta agn, aja che ades l mond é do a se mudé en prescia, y ence les Regoles à da jì do ai agn che passa. President dla Comiscion é Cinzia Ghedina de Antonia, y chi autres é Enza Alverà Pazifica, Luciano Cancider, Evaldo Constantini Ghia, Giorgio Costantini Titele, Giorgio Dibona Marco, Paolo Ghezze Ghizo, Ernesto Majoni Coleto y Ugo Pompanin Bartoldo. Al se trata de nuef regoliers a chi che al ti sta a cuer les Regoles, y che arà da avei dant i uedli avisa cie che al vuel dì les Regoles, les tradizions y les usanzes. La Comiscion mess laoré percie che les Regoles se adate polit al 2000 y che ales posse cialé inant, ma dagnora ence con n uedl out endò, savan che les Regoles deida tegnì adum i ampezans per les generazions che vegn. La Comiscion à scomencé a se ciaté ai 15 de lui y ala laora vigni mertesc, does ores do ceina, descutan i 40 y passa articui dl Laudo dla Comunanza. Plu inant aràla da ti cialé ai Laudes dles Regoles Basses y a chi autri che al jirà debujegn.