benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

N'autra ciampana
scrit ai 12 August 2003 da les 09:48:54 da noeles

Cultura

 

Concordia 2000: l'autra pert dla medaia


Ence les ciampanes pò daidé la gran speculazion turistica


de Umbert Cians

 MAREO - La gran ciampana é metuda su, Plan de Corones deventa l ciampanil per la Val de Puster y dla Val Badia. Les ciampanes dl post dess scuté per ne desturbé iniò i sciori y la jent dl post che dorm via per l di y busia de nuet. L di é sen per trueps rosedé. Les ciampanes auda perchel dalonc dal paisc y ales pò demé soné can che l mone dl turism l lascia pro. I trei ombolc entourn Plan de Corones à dé sie bensté. Al é vegnù rejoné truep de chesta ciampana, les dificoltés per la colé, l laour dl artist per la creazion dles figures, di simboi da mete soura via, la cornisc dles montes entourn Plan de Corones, l'infrastrutura per la mete su y la fé soné. Aldò dl inom l'ambizion é grana: crié Concordia tl mond, ma souradut anter les firmes che fej pert dl Skirama a na moda che ales se vegne y souradut che ales laore y davagne ben. La gran ciampana de Roverei, fata per i tomés te vera, fova denant sun n ciastel te Roverei y spo per segureza fòvela vegnuda metuda su dlongia l monument ai tomés te vera. En curt: dlongia la zité y con n segnificat che duc veid ite. Ala sona y recorda vigni seira i tomés te vera. Tl caje dla ciampana Concordia messonse propi ester naifs a ne pensé nia a la speculazion turistica: la ciampana à debujegn di implanc portamont per podei ti ruvé permez a ti cialé ju. A inom dl turism vigni piza de mont pò deventé n Col de Lana, ruiné y rosedé sotissoura, deventé na plaza per i fligri, n salf da conzert.



Ma a n paur ne ti él nia conzedù de tó demez na bruscia te sie pre da mont. L verdabosch dij de no. La sconanza dl ambient vegn tres y plu reclamiseda y al é propi la provinzia che lascia pro chesta desfigurazion dles montes. I partis che reclama l respet dla natura é sen dant les lites y ai mess mete averda a ne ti ajié iniò i taiers ai ostiers y a valgugn d'autri. Pro l'enaudazion dla ciampana àn podù audì dijan da valch ombolt che " l segnificat dla gran ciampana sunsom Plan de Corones n'é dessegur nia demé religious-spiritual". Brao ombolt, n puech de verité sautel fora, ma la senzierité fossa steda dessegur plu grana, sce al fossa vegnù dit che l segnificat é demé turistich. Vigni ciampana à valch de sacral y tré ite la ciampana ti afars, tla speculazion turistica, tl juech economich di implanc portamont é veramenter antisacral. La ciampana Concordia 2000 y duta sia infrastrutura à costé: chisc scioldi mess vegnì trac ite y porté davagn souradut tl davegní. Les ciampanes dla Gliejia dess scuté, ma la "divina" ciampana dl turism pò soné vigni domenia entratant marena, can che anter l scesciure dles scedons, dles forchetes, di cortiei y taiers degugn ne ti met averda y enscì tòmel demez ence chel minim de sacral dla Concordia 2000. La ciampana é na coriosité per tré adalerch sciors y garantí laour ai implanc portamont. N investiment per fé scioldi. L rest é fantasia, piec, fum ti uedli. Sce i messon fé chisc ac per tré adalerch sciors: desdruje la poesia, la beleza, l chiet de nostes montes, spo aronse tost ruvé, ajache d'auter de bel ne onse nia. Impede de pensé a defene nost ambient, nen fajonse cogoles da chidlé empera. Lois Craffonara te sie liber "Flus" lascia audì na poesia tl idiom mareo dl scritour furlan Celestino Vezzi che defen sia Cernia, na poesia, dij Craffonara "contra la politica y les leges desgraziedes, ma ence contra na certa forma de propaganda turistica che proa da enzaludé adalerch l ghest con la prostituzion de na cultura locala che vegn tramudeda te n folclorism teatral, matorin y gonot primitif".(if)

 

CHI PÜC DARÀ VITA A NA CERNIA NÖIA

Celestino Vezzi

Nos ne n'ùn nia pora
i restarun de püc,
mo chi püc darà vita
a na Cernia nöia.

I fajarun na bela resserva
cun fertrat da spic dlunch incërìa
y i fajarun valëi nüsc dërc!

Por fà plajëi ai ghesc'
- nes mudarunse cun i bì guanc dla Cernia
y al sonn de val' armonica
ciantarunse de cör
les cianties dla vedla Cernia;
- i tignarun impé les vedles usanzes
"scëibes" che döt gracia
ince fòra de sajun
basta ch'ai les paies;
- la sabeda y la domënia
o canch'ai s'al damana
dauriarunse les ciases de nüsc paîsc
y ti mostrarun sciöche an viô zacan.

Ai tlocenarà les mans
branciarà tl tacuìn
y nes sporjarà n euro por vire!

I ne i dijarun nia
ch'i sun te chësta situaziun
a gauja dla lege y di proiec
ch'an à fat por nostes munts,
mo i ti dijarun plülere
ch'al é por nosta lîta
por che la Cernia vires.

Nos ne n'ùn nia pora
i restarun de püc,
mo chi püc darà vita
a na Cernia nöia.

 


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 4.6
Oujes: 5


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: N'autra ciampana (ponc: 1)
da travers ai 12 August 2003 da les 23:41:29
(Infos sun l utilisadour | Ti mané n messaje privat)
Trueps de chi de Al Plan se baudia che ai ne aud nia la Concordia, a mi me àl sapù bel de audì chela autra ciampana sun noeles.net. Finalmenter zachei che dij fora cler cie che trueps pensa de chesta operazion de marketing turistich! L autour dl articul sotlinieia la finalité economica dla ciampana, chela de cherdé adalerch sciori y grosc, a dann dla pesc, dl ambient, di sentimenc dla jent dl post. Perdert ne fossa chest degun scandal, la storia nes ensegna pu che l enteres economich, la ingordia ne se archita dant da deguna bariera culturala, morala o religiousa. La glejia entessa ne à nia bazilé tl passé a soné les ciampanes per cherdé la jent a fé veres santes y manco sentes y a soné adum per la gloria de valch potent sun la Tera. L scandal sta tla ipocrisia de chi che ne se enfida nia a dé pro de cie che al se trata y proa de vene la ciampana sciche na opera de begn per l'umanité. I condanés a mort arà pa ben puech daenciarà, speron che ala sone almanco per chi che lascia la vita sun les pistes de Plan de Corones.
La Concordia recorda n'autra operazion turistica, ence chela promoiuda da organisazions turistiches de Mareo, l ciavel d'or de Dolasila sun Sas dales Nü. L ciavel de Dolasila fova ciamò plu grotesch che la Concordia ma ence laouta en fòvel de chi che minova de messei defene na operazion de reclam turistich sciche na gran opera d'ert a chela che messova se mete a desposizion finamai l regn de Fanes. Chi ne se recorda pa nia les critiches de certes persones, che se autoproclameia artisc', contra la ignoranza dla jent che ne fova nia bona de vedei ite l valour de n event artitich mostré da la televijion soura dut l mond? Per fortuna se à descedé tl ultim moment chi dla politica y per na fortuna ciamò plu grana à l temp slavaté via les fusties dla opera kitsch plu colossala mai penseda tles Dolomites. Che i sponsors dl turism ciale de vene sie patuc sciche operes pies sonsi ciamò bon de capì ma che certes beles animes ladines proe de nes vene vigni kitsch sciche na opera d'ert tofa da manipolazion iteletuala y morala al servisc di patrons. I saré ben ie sourt ma i rate che Schiller y Dolasila ne essa nia dé ca gen sie inom per de tel operes contra (la) natura sciche l ciavel d'or Dolasila sun Sas dales Nü y Concordia sun Plan de Corones.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.392 seconc