benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Fodom-Col-Ampez
scrit ai 11 August 2003 da les 10:44:54 da noeles

Cultura

 

Al spizoleia l terz Istitut Ladin

La pruma senteda ofiziala dl Istitut nuef per Col-Ampez y Fodom - L ombolt da Col: "Sen messonse laoré per che les provinzies da Bulsan, Trent y Belun reconesce la Union Generala"

de Lorenzo Soratroi

L prum embrion dl Istitut ladin "Ciasa dla Cultura ladina" à ciapé forma enchestadì ja Col Santa Lizia. Sun envit dl Capocomun Paolo Frena, s’àl abiné enfat l comité che messarà ti dé forma a chesta istituzion importanta per i trei comuns de Col, Ampez y Fodom. A la senteda à tout pert i raprejentanc dles aministazions de comun y dles trei unions ladines, clamés a fè pert de chest comité propi da na delibera dl consei de comun de vignuna dles trei comunités ladines. Deberieda a chisc ence doi esperc de aministrazion, l dot. Luca Agostini y la dot.a Antonella Fiore y i diretours di istituc de Fascia y Badia, Fabio Chiocchetti y Leander Moroder.  Sun l retrat: entratant la pruma senteda ofiziala.



Chesta é steda la pruma senteda ofiziala che à servì per dessegné fora l prum sedim dl nuef Istitut che arà sia senta tla Ciasa de Jan. L edifize vegnirà laoré fora te chisc meisc, de gré a contribuc dla Region dl Venet, dla Fondazion Cariverona y dl BIM, per podei enjigné ca i prums salfs olà che al giatarà lerch i ofizes dl istitut. Ma co ésen ruvés a avei na tel istituzion demé per i trei comuns, canche tla provinzia de Belum, l Consei Provinzial à "batié", dant trei agn, ben 39 comuns desche ladins? De n istitut òven scomencé a nen descore ciamò tla Federazion, ma tost òven capì che l’impostazion y i fins che i trei comuns ova tla ment per chesta istituzion, ne fova nia i medems de chi che ova en ment i neo - ladins. Does conzezions che é restedes tales ence canche a volei mete en pé n istitut s’à ofrì la medema Provinzia che ova ence ela indiché Col desche senta ideala. Logiches les pesimes di trei comuns  che s’à damané tost sce al fova l caje de jì a fè pert de n’istituzion che ne essa nia laoré do chi criters che enveze se à tout dant i istituc de Fascia y Badia. A chisc segns de indezijion, la Provinzia ne se spetova nience che al ruve na resposta ofiziala dapert dl comun da Col sun la desponibelté o manco de azeté la senta ofiziala de n istitut per duc i 39 comuns y ala dezidova che chesta istituzion nueva essa abù alberch a Selva de Ciadoura y a Bourcia de Ciadoura. Sun na tala vedova i trei comuns la strada daverta a se mete en pé n istitut demé per ei. L medem Stat Talian ti conzedova bele per l ann 2001, ben 65.000 euros de contribut y enfat decretòvel che tla provinzia de Belum esisteiel does "animes" ladines: i "storics" y i "neo - ladins".

Chisc contribuc sarà i prums, deberieda a n cofinanziament di trei comuns che vegnirà adorés per envié via les prumes ativités. Emprumadedut per tò su personal, fè conesce la lege nazionala 482/99 sun les mendranze, mete a jì cursc de ladin y e.i.. Chest laour vegnirà apoié dai doi istituc de Fascia y Badia - Gherdeina, che à empermetù de daidé pro ence con l fornì bona pert dl material, che ei à bele a desposizion. Grana la sodesfazion dla Consulta Ladina per chesta desponibelté vegnuda da les vals ladines dl Sela, che reconesc l gran laour fat dai trei comuns te chisc agn, per se taié fora n’autonomia da dut l rest dla neo ladinité de Belum. "Al é demé l prum vare" à dit l capocomun da Col Paolo Frena. " Sen messonse laoré percie che les provinzies reconesce la Generela y che al vegne metù en pé chest organism de coordinament souraprovinzial anter les vals ladines".


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.408 seconc