L parch natural Scilier deventa majer
A convence la jent dantaldut ence i maiours contribuc, enfin al 50% plu auc che defora dai parcs
(if) La jonta dla provinzia à dé pro chisc dis l ampliament dl parch natural dl Scilier desche proponù dal comun de Tiers. L ampliament aspana 946 hectars endut . Sodesfat l assessour al ambient Michl Laimer: "Nia demé ciuldì che al se trata de na contreda che al paia la mueia de mete sot sconanza, ma ence ciuldì che l'iniziativa é pieda via dal comun de Tiers, cie che desmostra che l conzet di parcs naturai é n model che vegn reconesciù y aprijé". L parch natural dl Scilier tol ence ite raions ladins y termeneia con Fascia. Sun la foto: na veduda dl Ciadenac.
La prozedura é steda scempla: tl meis de mei 2002 à l consei de comun de Tiers deliberé de propone l ampliament a la jonta provinziala y tl meis de dezember 2002 à la pruma comiscion provinziala per la sconanza dla contreda aprové la proposta. Chisc dis à la jonta provinziala deliberé l ampliament ofizialmenter. Al se trata de n ampliament che fej fora l 16% (946 hectars), l raion se deslergia a pé dl Ciadenac enfin a les Tors dl Vaiolet, dai pres carateristics denominés "pres da fops" (Buckelwiesen), ai larjeis da pré.
L vizediretour dl ofize parcs naturai, Enrico Brutti, à dit che an à messù se engiamié truepes informazions y minonghes anter ofizes a la sconanza y la jent dl luech denant che ruvé tant inant. Ence sce l consens per la sconanza vegn majer, ne él empò nia tant saurì da sotmete contredes nueves a liams de sconanza. Tla popolazion él, en particolar pro i proprietars di terac interessés, ciamò truepes temes. Ai pensa che n liam de sconanza comporte per ei deplù desvantajes che vantajes. Per chesta rejon é i tecnics dl ofize vegnus a descore fora empera dutes les pesimes y i dubes. Ai à cialé de dé informazions a na maniera ogetiva y completa. La contreda che vegnirà sconeda tl davegnì é vegnuda metuda sot a na sort de "analisa de cualité" che tegn cont dl valour natural dl raion y ence dl gré de antropisazion, vuel dì di laours che la persona fej te chest raion da vedlamenter: vardé tiers, taié legnam y e.i.
Per arjonje n consens ampl él vegnù tegnù na lingia de encontedes publiches, souraposc' y reunions con i abitanc dl comun de Tiers, azican duc i aspec liés al ampliament dl parch. Enultima à convenciù les pertes positives che n parch natural porta con sé: la priorité tl ejam de domandes de contribuc, les premies dl 50% plu autes a paredl con les contredes fora dl parch, l derturament di trois y dles semenes a ciaria dla aministrazion dl parch y e.i. L ampliament dl parch natural dl Scilier vegnirà festejé ofizialmenter ai 13 de setember. (fontana: OSP)
