L trasport de 21.400 scolés al di é enjigné
L servisc de trasport per 21.400 scolés per vigni di entant l ann de scola 2003/04 é vegnù dé pro dal govern provinzial
(if) 
Ence per 600 scolés y mutons handicapés che mess ruvé vigni di a scola, te berstots o zentri de reabilitazion, à la jonta provinziala dé pro l servisc de trasport. Da d'auton podarà 17.300 scolés furné con les corieres y la ferata de linea a scola. 4.100 scolés vegnirà menés a scola con auti privac sciche taxis. Enchin a 380 firmes vegnirà enciariedes per chest servisc che é ciamò vegnù dé pro dant la paussa da d’isté dl govern provinzial. I 600 scolés y mutons handicapés vegnirà menés con auti speziai dla comunité de laour per handicapés, la Pro Juventute y l Servisc dla „Lebenshilfe“ a scola, tles berstots o ti zentri per handicapés. Entratant l viade vegnirà chisc scolés ence acompagnés.
Sce l jì a scola se l damana él enchinamai poscibel fé cater viadesc al di. „Nost fin é chel che les corieres portés i scolés bele dal prum di de scola da ciasa enchin te scola“ à sotrissé l’assessoura Sabina Kasslatter Mur. Per l servisc de trasport él vegnù vedù dant endut 6,964 milions de Euro fora dles casses dla Provinzia. Chesta soma ti met l ofize per l’assistenza a les scoles a desposizion al ofize per l trasport de persones. Do che l govern provinzial a dé pro l servisc de trasport per scolés messarà l ofize per l trasport de persones abiné tres l scrive fora di laours firmes adatedes y mete ju n contrat con eles. La gran cumpeida de servisc da mete a jì se damanarà na bona organisazion da pert dl ofize competent. (fontana: OSP)
