Gran suzes per l Cor Fodom
Oramai plu de vint agn che i corisc' conesc chisc luesc y che ai mantegn de bogn raporc con n valgunes families dlafora
de Lorenzo Soratroi
(if) Gran suzes per l Cor Fodom che la edema passeda é sté endò ghest per trei dis tla bela zité de Karlstadt, a puec chilometri da Würzburg. Al é oramai plu de vint agn che i corisc' conesc chisc luesc y che ai mantegn de bogn raporc con n valgunes families dlafora. Al fova dl 1980 sun la Plaza S. Piere de Roma can che l cor, enlaouta ensigné ju da Benigno Pellegrini, se giatova dlongia a ei n grup de mutons todesc che sonova chitares y flauc (fablos). Da ilò vegnìvel natural de descore, de se lascè na adressa. L ann dedò fova chisc mutons vegnus ite a Fodom y i corisc' fodoms fova jus a Karlstadt. Da ilò àl scomencé n raport sterch con n valgunes families che dura ciamò encuei do plu de vint agn.
Vigni viade é sté na festa, se enconté anter jent che sta gen adum, ence sce separés da sies-cent chilometri. Entratant l viade duré dut l vender y la sabeda à abù i corisc' l’ocajion de jì a vijité na biraria y se passé enscì na giorneda scialdi lesiera. Ma da seira ti spetòvel al Cor Fodom i apontamenc plu de peis. Da les sies la Messa cianteda tla gliejia moderna dla S. Familia, la bela Spitalkirche che é bel amesa Karlstadt. Na gliejia con na bona acustica, fata su entourn l 1600 che s’à tost emplenì de jent, coriousa de scuté su les cianties da mont y ladines dl cor. Ben catordesc cheles metudes sun l program dal diretour Lorenzo Vallazza, ma che ne à nia acontenté la jent che s’à levé sun pé a la fin dl conzert per bate les mans al Cor Fodom. Ence la stampa locala de Karlstadt, Main Post, ti à dediché a chest conzert n bel articul, olà che al vegn esauté la cualité vegnuda fora dal cor te chesta ocajion. La domenia dadoman, é vegnù l Cor Fodom ospité dl ombolt de Karlstadt tla ciasa vedla dl comun, l Rathaus, n bel edifize storich che carateriseia la plaza dla zité. L’enconteda é steda scialdi bela y sentida da duc. L ombolt à recordé che Karlstadt é enjomelineda bele da n valgugn agn con Mühlbach fora en Puster. Per chest, n auter ann vegnirài te Südtirol con sia aministrazion y ai fajarà ence n saut ta Fodom. Per l cor él sté na bela plata nueva de storia, n'ocajion per tegnì strent l liam con les families de Karlstadt y ence per promueve dal pont de veduda turistich la val da Fodom.
