La scuadra marora ti l’á sticheda al ultim moment
Desche pest n pedron dolomitich zinzolé de cristai - L pest vegnirá jié fora en auter ann endò
Pro i juesc metus a jì en domenia, ai 20 de messel, sun l ciampei de Fodara Vedla é les ampezanes stedes les mioures tournadoures dla pegna, depierpul che i ei ampezans é stés i plu gaierc a taié n clapon/mocul de legn y chel sibe con l sigon a man che con l manarin. La scuadra marora à messù se regucé ite les manies perdementer per ti sté do y cialé de refé. Ai ti l’à sticheda a tré n mocul/na taia, a ciarié ite n lenzuel de fen y a clipé les vaces, ma Ampez fova empò ciamò dant per 5 a 3. Fova pa i ampezans endò daidés adascousc dal "malan" desche la liejenda conta? Enultima á l tré a la corda messù dezide ciuna scuadra che se davagna l pest di Juesc de Fodara Vedla.
Tla proa de forza a tré a la corda à Mareo abù la souraventa sun i ampezans y chel propi al ultim moment; do na deventa na outa porom, à permò la terza proa porté la dezijion, te n moment de flacheza di ampezans ái abú la miour. La scuadra marora á podù se porté a ciasa l prum pest, n pedron dolomitich bendebot gran zinzolé de cristai alpins. L pest vegn endò metù a desposizion en gaujion di proscims juesc che vegnirá tegnis en auter ann. La orela curta é steda grana y l scenar á fat revive la mont de Fodara Vedla con sies ciajeres y scofes aclapedes adum con entournvia l bel ciampei verdient (ciampei = l pré entourn les uties/ciajeres da mont).
tré a la corda
