benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Les gran linies de program dla lista LADINS
scrit ai 21 July 2003 da les 16:01:57 da noeles

Politica

 

"Na mioura raprejentanza politica sciche fondamenta per arjonje deplú reconesciment"

L travert dla Lista é chel de arjonje 2 aconsiadours te consei de lege y n assessour de dert y nia un cherdé a plajei 

I reporton per entier les linges programatiches dla Lista Ladins desche ales é vegnudes portedes dant en ocajion dla prejentazion en sabeda a Santa Cristina. La Lista LADINS é dantaldut dret contenta de avei arjont che da chestes lites pòla endò se prejenté sciche lista autonoma do che la lege litala dl 1998 dla Svp fova vegnuda declareda incostituzionala sun recurs de Carlo Willeit y do che nience en l ann passé ne ti él garaté a la Svp de porté tres na lege che essa prevedú n scialin lital o ciamò piec n "Ladinerpassus" che essa comporté n anientament politich di ladins. L program en curt: "Nost moviment se darà inant da fé per i derc fondamentai dla popolazion ladina, per la valivanza giuridica, per na majera sconanza dla cultura y dl lingaz, per na bona colaborazion tla sozieté. Dantaldut volonse arjonje na maioura raprejentanza politica y aministrativa di Ladins te duc i organs y organisms plu emportanc, doi aconsiadours provinziai y n raprejentant te Jonta per lege. L azes a les comiscions dl Consei provinzial y al Tribunal aministratif, la partezipazion a les comiscions dl'autonomia é n valgugn traverc emportanc. L mantegniment dl sistem lital proporzional zenza sbaramenc é n vantaje per duta la popolazion, per l pluralism politich, per la parité culturala y la colaborazion. La lege litala nueva dla Provinzia sarà per la raprejentanza ladina autonoma l prum gran compit. La lege sun l referendum che corespone ai debujegns dla mendranza sarà n'autra chestion emportanta.



La posizion soziala, i derc soziai y culturai baseia sun l reconesciment dl lingaz. Chilò onse n gran debujegn de recuperé per cie che reverda la elaborazion, l emparé (dantaldut tles scoles autes) y l'adoranza ofiziala dl lingaz. Chilò él prevedù na seria de mesures concretes. La scola ladina mess podei garantì concorenzialité sun duc i liviei di modiei, dles metodes, dl personal  y dles istituzions. La cultura mess podei vegnì deslarieda fora a duc i ladins y giaté n bon raport de barat ence con les autres cultures. I LADINS é per l'agregazion di trei comuns storics dla Provinzia de Belun a la Provinzia de Bulsan. I sistems de comunicazion y d'informazion per y anter i ladins tl lingaz ladin à debujegn de n ampliament sostanzial, dantaldut per cie che reverda l radio y la televijion publica. Do che i ultims 20 agn à demé porté empermetudes, cialarà la Lista LADINS a soluzions nueves.

L mantegniment de n ambient san é dagnora bele sté n nost obietif prioritar. La speculazion y i priesc massa auc é da limité tres l'intervenzion dla man publica con regolamenc aldò. L'economia locala y tipica per i raions da mont, les aziendes artejanales sciche ence les dites de picera y majera dimenjion dess giatè tres regolamenc aposta, tres finanziamenc y mesures de sconanza l dret sostegn. Les servitus de forza sun les pistes é da limité. Al mess ciamò vegnì chirì deplù sinergies anter paurs, artejans y turism.

L durturament dles stredes ite per les valedes, les zirconvalazions di paisc y la segureza di joufs resta inant ponc spezifics de nost program. La segureza sun dutes les stredes y vies de trasport n' é nia manco emportantes che la costruzion dles gran reis de coliament. Nos son per na linia dl Brenner morjela y contra la realisazion dl'Alemagna.

Sciche mendranza onse n raport spezial per i debujegns soziai dla popolazion. La sanité, l'assistenza y la previdenza costa tres deplù, ma chesta é la dreta richeza dla comunité. Con na bona aministrazion, n puech de razionalisazion y l sostegn da pert dl volentariat él poscibel de sparagné zenza aciarié i interessés con speises y autocontribuzions en plu. Nos son per l mantegniment dla cuarta Unité sanitara y per l ampliament di distrec.

A la familia méssel ti vegnì dediché na lege aposta, te chela che nia demé i mutons, sia assistenza, l educazion y la joeneza giata conscidrazion, ma ence l abitazion, l laour y l temp lede.
La liberté y l pluralism tles idees y tles azions, tl'economia y tla cultura, tla vita publica y privata dess ester y resté na carateristica fondamentala de nosta sozieté".


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 3
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Les gran linies de program dla lista LADINS (ponc: 1)
da travers ai 21 July 2003 da les 21:43:56
(Infos sun l utilisadour | Ti mané n messaje privat)
La pert plu concreta y ence plu emportanta dl program dla LL é zenz'auter la ghiranza de na raprejentanza sterscia di ladins ti organs desvalifs de provinzia, region y stat. La azion de Carlo Willeit à paié y à mostré che a chirì l compromis sun i derc fondamentai dla jent àn demé da perde; la passivité dant la cherdeda dl assessour é na desmostrazion.
La pert soziala me per plutost generica y debla, valch che duc pò sotscrive, da man dreta a man ciampa, y che ne engajeia degugn. Per ester credibla jìssel debujegn de indiché coche an pensa de arjonje chisc traverc, strategies y mesi, ejempli y modiei, modalités y temps. Per ester complet mess n program indiché traverc y na metodologia de laour: i prums é schizés, la seconda é ciamò dura tl aria. L litadour se aspeta che ala ne reste nia tl'aria.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.385 seconc