benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Sun Fodara Vedla - Ampezans y maroi se enconta
scrit ai 18 July 2003 da les 10:45:12 da noeles

Cultura

 

Chi é pa i plu gaierc, chi mouj pa miec y chi tourna pa piec?

Juesc a recordanza de na liejenda - Na scomenciadiva metuda a jí deberieda da les Assoziazions turistiches de Al Plan de Mareo y de Ampez

Per viventé endò la conteja dles montes de Fodara Vedla/Senes vegnirál metù a jì sun Fodara Vedla, tl parch Natural  „Fanes Senes Braies“ y  „Dolomites d’Ampez“ sun scomenciadiva dles does Assoziazions turistiches de Al Plan de Mareo y Ampez n dí de juech y orela curta. Con chisc juesc déssel vegnì strent simbolicamenter y te na forma pajoula i liams secolars anter Mareo y Ampez y enrescí endò n iade chi che é i plu gaierc Maroi  o Ampezans? Zacan, sciche la liejenda conta ova i Ampezans abú la souraventa. I garejadours messarà desmostré de avei forza y de ester asvelc per podei ti la stiché al paisc vejin. I juesc é duc ambientés tl mond da paur: tré n drembel/mocul (de 30 kg), tré n anel de metal sun na stangia  raitan con n ciaval, ciarié y porté sun les sciables n lenzuel de fen, tré a la corda, tourné la pegna, taié amesa fora na taia con n sigon, taié amesa fora na taia con n manarin, sciuré n sach de n kilo te na bot raitan con n ciaval, mouje na vacia y de auter. La manifestazion vegn tegnuda sun   i pres da  mon de  Fodara Vedla, a 1.980 m de auteza,  a mez  troi  anter Cortina y Al Plan de Mareo, en domenia ai 20 de messel da les 10:30 inant.
 


La vera anter ampezans y maroi
 
Anter Ampez y Mareo fòvel sté gonot stritaries per l possediment de pastures tles montes che confina con les does comunités. Per mete i termegn te Fodara Vedla y te Fosses y per finí na bona outa les rejiaries anter i doi stritadours se òvel n dé abiné sun chestes montes valgugn Maroi y valgugn Ampezans per dezide sun l da fé, per mete la pesc. Finalmenter se fòvei gnus (ái vijiné) con n compromis. Sun l post, olá che ai contratova, fòvel n gran sas y i ampezans ova fat chesta proposta: "Tant inant che nos son bogn de porté ite per la mont chest sasson de cater oms, ilò déssel ester l confin". I Maroi ova aconsentí, zenza sospeté dl engian di Ampezans che laorova con l aiut dl malan. L fat vegn conté tla rima "L Miraco" dal prof. Tita Alton te "Rimes Ladines" a plata 35-36 che é chilò dessot trascrita:
 
L miracul
 
Chi mai ne ará pa audí gonot
contan dla vera che á doré
tra Ampez y chi de Mareo n bel bot
tra l jí y se bat, tra l sté y pluré?
Fodara Vedla y Fosses, biei
pasciantadours per truep bestiam,
en fova la gauja; entrami riei
vagova vignun co gen l'ejam.
 
Enultima veidei che ala ne pò
plu jí de chela sort: adum
per chest s'abínei y pensa co
che an mess fé per finí l slum.
 
Olá che ai stova fòvel n sasson
tant gran che cent omi ne l'essa porté
"Tant lonc" dij i Ampezans "che i porton
en cater chest sas, sie nost raté".
 
Mareo credova de avei n contrat
de gran utl, per chest azétel snel
Y zenza contesté, l bur fat
Odan permò con l dí nevel,
i cater omi leva l sas
Enscí che al fossa na pluma y va
bel lize su dret empede de jí bas
Ensciche ciaria che ne á nia da tré.
 
N pezon fòvei jus
 y nia ne podova
i fermé; che al fossa da temei che la mont
entiera jissa perduda vedova
vignun che ova uedli sot la front.
 
Deguna speranza ne òvei plu
i Maroi. Passé passòvei sen
pro na ciajara che eva da sclu
resteda per ester bel saren.
 
La ciajarina vedan passan
la schira scraia dal gran spavent:
"En inom de Die, chel che i on dut cant
nes tòlei zenza compliment".
 
Mo vè, o miraco, en chel moment
tòmel l sasson sot ite i cater
d'Ampez fracés con gracenament
de si osc ensciche an ne veid plu auter.
 
Enscí la ciajarina ova rot
col pronunzié l inom plu sant
La forza di malans che eva sot
al sas per tó ai Maroi dut cant.
Aldidancuei podeise l vedei
ciamò tl luech che al é tomé,
lassoura él cater ciers; che  sie vei'
credede chel tant che i á dit, co me

 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.475 seconc