benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Convegn sun l Ciastel de Andrac
scrit ai 15 July 2003 da les 07:52:58 da noeles

Cultura

 

Storia y misters dl Ciastel de Andrac y sia valorisazion encuei

L architet Valentini á conté di laours de restruturazion pro l Ciastel de Tor, sen Museum Ladin

de Lorenzo Soratroi

L ciastel de Andrac/Fodom é sté per dut l fin d'edema sot i uedli dl'atenzion culturala de Fodom, ma ence de trueps sciors interessés al patrimone cultural y storich di fodoms. En sabeda seira él vegnú metú a jí per scomenciadiva dl'Union di Ladins da Fodom, dl assessorat a la cultura dl comun de Fodom y dl Atal, na seira de discuscion soura i laours de derturazion y sun la valorisazion turistica che l ciastel podessa avei.



A la senteda á tout pert l Souraintendent ai bens culturai dl venet, l architet Guglielmo Monti, l architet Marino Baldin che ti é sté do ai laours de restruturazion per ben 15 agn alalongia y l architet Valentini dla Souraintendenza de Bulsan che ti é sté do a la derturazion dl Ciastel de Tor a San Martin, na ocajion per paredlé les filosofies de intervent che esisteia decá y delá dai joufs. L architet Monti á dit dantfora che la volenté é tres steda chela de mantegní co che ales fova les rovines dl ciastel y de ne volei refé su nia deplú de chel che la storia á lascé dessourora. "I ne volon fé su degun ciastel a la Disneyland o Gardaland" á dit Monti, "ciuldí che al fossa ti fé n tort a la storia". L ciastel é da mantegní sciche al é, davia che si murs á truep da descore. Sce i essan fat su valch, essanse asconú via truepes particolarités che an ciafia enscí ciamò da vedei. L architet Baldin á conté, tres sies beles diapositives, la storia dl ciastel lieda a les mineores de Fursil. L projet dla Souraintendenza á ence tout ite la gliejia de Col y de S. Fosca. Al se á traté de na relazion interessanta che á fat conesce ence a trueps fodoms n toch de storia puech conesciuda. L architet Valentini depierpul á conté co che al é vegnú restruturé l Ciastel de Tor che albergeia sen l Museum Ladin. De segur, al fova ilò na situazion dret desvaliva da chela de Andrac, ma l resultat é sot i uedli de duc. An ne po nia se desmentié che a San Martin él vegnú spenú 18 miliards de vedles lires, contra i 4 per l Ciastel de Andrac. A la fin á Nani Pellegrini mostré zacotant de dessegns storics dl ciastel per mostré co che n valgunes particolarités é vegnudes documentedes da la storia y per stimolé na discuscion anter les truepes persones ruvedes adalerch per chesta gaujion tl salf di Congresc a Reba.


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.364 seconc