Chisc dis à les scoles sclut les portes do i ejams finai. L'Intendenza ladina fej n bilanz di resultac: di 45 candidac interns dles cinch scoles autes à duc arjont la promozion con l'ejam de stat. Tles scoles mesanes à 203 di 208 scoleres y scolés che à podú fé l'ejam arjont la promozion. Di 1300 anter scoleres y scolés dla scola elementara é 1281 passés. Nioles fosces per cie che reverda l davegní de valgunes scoles autes ladines, l numer de iscrizions va endò, enscí á dit con festide Intendent Roland Verra (sun l retrat) te na intervista deda al Radio Ladin.

Tl ann de scola 2002/03 à 1300 scoleres y scolés frecuentè la scola elementara, 675 la scola mesana y 226 studenc y studentes una dles cinch scoles autes dles does valedes ladines (ITC da La Ila, Lizeum da La Ila, ITC de Urtijei, Scola d'ert de Urtijei y de Selva). Di 45 studenc interns à duc superé l'ejam de stat. Tl ITC da La Ila él stè en chest ann per l prum iade tla storia de chesta scola l mascim resultat de 100/100 da pert de n student y de na studenta. N resultat mascim él ence sté tl ITC de Urtijei y tla Scola d'ert de Urtijei.

Tla scola mesana à 203 di 208 studenc che à podú se prejentè al ejam de terza ence superé chesta proa, chel vuel dì che demé l 3,79 % di scolés y dles scoleres n'á nia arjont chest travert de oblianza. Tles prumes y secondes classes él vegnú valuté endut 491 scolés: 13 n'é nia passés. "Ala fin dla terza classa dla scola mesana desmostra i scolés na bona conescenza di cater lingac d'insegnament", dij l'ispetour dles scoles ladines Lois Ellecosta che à acompagné te sia funzion duc i ejams dla scola ladina. I resultac dla scola mesana po vegnì paredlés con chi dl ann passé, dij inant l ispetour ladin. 29 scolés à arjont l resultat mascim "ezelent" y 38 la nota "dret bon", chest é l 32 % sun l total di scolés che à fat l ejam che à sclut ju dret ben la scola mesana.
Di 1300 anter mutons y mutans dles cinch classes dla scola elementara en él passé 1281.
Dai dac dl'Intendenza ladina végnel fora resultac da ester contenc che se pò  mesuré con i resultac nazionai.

Nioles fosces per cie che reverda les iscrizions nueves al lizeum y a les scoles d'ert. L numer de scolés va endò (if)

(Fontana: ofize stampa provinzial)