Noeles.net - Informazion ladina - Tl Beluneis végnel batié ladins en massa per ruvé pro i contribuc

Ampez, Col, Fodom y La Rocia vuel jí do si trois

I Ladins d'ofize manacia de jí dant dal giudesc y vuel la majera pert di contribuc

La despartizion te does sezions dla Federazion di Ladins dl Venet podessa avei les ores cumpededes. En vender, ai 11 de messel, se abinaràl l consei clamé ite dl president Iji Menardi olà che al vegnirà descorù fora n pont soul, ma che sta a la fondamenta de dutes les stritaries anter “neo – ladins” y “ladins – storics”: la despartizion di contribuc regionai en basa a la lege 73/94. Do l’aprovazion dla perimetrazion da pert dla provinzia de Belun di comuns che se à declaré ladins é la prescion de duc chisc de ruvé ite tla Federazion deventeda tres maiour per podei permez ai contribuc. L’amiscion de chisc comuns y di raprejentanc dles union ladines é sté l pont prinzipal de discuscion di ultims doi agn tl consei dla Federazion. Calalzo de Cadore é p.ej. vegnú scrit ite d'ofize. Samben cotant desvalives les vedudes sun la tematica ladina. Sen vuelen la despartizion.

I “neo – ladins”, Ciadoura y Comelich reclama a gran ousc na mudazion al statut che dess pervedei na costituzion nueva dl consei y na despartizion nueva dl contribut. Plu outes él vegnù clamé ence la Region en causa, ma da Aunejia él tres ruvé la resposta che la Federazion é n ent che á na sia autonomia, n sie statut y chest vuel dì che demé l consei pò dezide, sce al vuel tó ite unions nueves o nia. I Ladins “storics”, adum a Rocia, à tres sostegnù la nezescité che an mess avei na idea clera sun la realté “neo – ladina” che s’à enjonté permez do la dezijion dla provinzia. An ne dess nia se desmentié dl fat che sot Belun esisteiel ence i “ladins d’ofize”, scric ite da la provinzia sciche ladins, zenza che l comun l ae damané. Al é l caje p.ej. de Calalzo de Cadore, olá che demè l embaraz per na locia ite amez a la “neo – ladinité" y la prescion dla provinzia à porté a na declarazion formala de ladinité. Da capì spo l sentiment di ladins “storics” che veid tres deplù sia identité manaceda da chesta vueia de ladinité, sburleda demé da l’oportunité de podei pro a valch sciold. Da chilò la proposta de despartì la Federazion: da una na pert i ladins “storics”, deberieda a Rocia, da l’autra dutes les unions dl Agordin y Ciadoura che podarà enscì dezide de se tò ite te sie grup dutes les unions che al ti endeleta. Al ne esistarà nia plu n consei diretif y la Federazion se limitarà a ester demé n “pont” per i scioldi che vegn da Aunejia. Da giut ova l president Iji Menardi damané che chest pont vegne porté al consei, dles propostes de despartizion dl contribut, che tegne cont no demé dla popolazion di comuns, coche al volessa zachei, ma ence de criteres obietifs che tegne cont dla storizité, dla coscienza ladina, dles ativités culturales y enscì inant. Ciamò n iade él sté i trei comuns a se dé da fé per nen vegnì fora. De fat à les autres sezions mané a dì che ales ne prejentarà degunes propostes y che an pensa endere de jì per trois legai. La proposta firmeda dai trei comuns “storics” deberieda con Rocia preveid parametri y coefizienc che tegn cont dl descore, dla coscienza, dla storizité. Da chest éssel da sauté fora la despartizion di contribuc.
A la senteda tolarà pert ence l assesour a les mendranzes dl Venet, Maria Luisa Coppola, che podarà enstessa se rend cont dles tenscions che brova da tres é al intern dl consei dla Federazion. Per agn é i trei comuns vegnus acusés de ne volei net nia mudé tla Federazion y ciamò n iade ései stés i soui a porté sun meisa n document de discuscion. Ence de chest podarà la Region che aministreia i contribuc se rend cont. ( Ls:if )


Vos ne seis nia loghé ite. [ Loghé ite ]