"Milesc de amatours dla roda al start"
7000 margherites plovará da n joler sun i partezipanc - La gara vegnirá trasmetuda en domenia da les 12.30 inant sun Italia Uno
"La Maratona dles Dolomites" é oramai l aveniment sportif numer 1 entratant la sajon da d'isté tl'Alta Badia. Cie che ova metú man sciche manifestazion scempla y alabona, se á svilupé a na manifestazion a ressonanza internazionala y che á debujegn aldidancuei de bendebot de organisazion logistica. En domenia, ai 6 de messel, al prum albié da les 05.30, piará via a La Ila la 17eisema edizion dla "Maratona dles Dolomites" con endò trei rodes a lita: la roda longia plu sfadiousa de 147 km (i 4 joufs dl Sela, plu jouf de Giau y Fauzares), la roda mesana (i 4 joufs dl Sela, plu Fauzares) y la roda lesiera entourn i 4 joufs dl Sela. Sciche salut ai partezipanc lasciará tomé n joler encer 7000 margherites. L travert final per dutes trei les rodes é a Corvara. Ence eniann se ál scrit ite soura 8000 partezipanc: 2200 todesc, 600 olandeisc, 254 austriacs, 121 svizers, 69 belgs, 45 americans, 33 cecs, 27 franzeisc, 8 israelians, 7 spagnoi, 5 giaponeisc, 2 canadeisc, 1 n colombian y 1 n australian y de autri. Anter i partezipanc él ence da giaté chest ann valgugn vips sciche Romano Prodi, president dla Comiscion Europeica, y samben nosta Maria Canins. Sot http://www.maratona-dolomites.com pòn vedei n grum de autri detais sun la manifestazion. La Maratona dles Dolomites comportará valgugn problems de transiament sun i joufs dolomitics entratant la doreda dla manifestazion.
La organisazion de chesta manifestazion é tles mans dla Uniun Rodes Alta Badia con a cef Michil Costa (sun la foto) dl Hotel La Perla a Corvara sciche president. La organisazion se fistidieia dl guern ai garejadours sun dut l percurs sciche dl beive y dl mangé che ti vegnirá ofrí ai ziclisc' sun viade y de dutes les manifestazions de cornisc. Encer 900 é i volentars che deida pera. La 17eisema edizion ti é vegnuda dedicheda per la gaujion dl ann internazional ai andicapés. La premiazion di miours ziclisc' vegnirá fata en domenia, da les 16.30 inant a Corvara do che la majera pert ará arjont l travert. Sce l temp deida pera pòla deventé endò n gran suzes.
