benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Na iniziativa dla AT San Martin de Tor
scrit ai 03 July 2003 da les 07:28:21 da noeles

Cultura

 

Fuech y flames: la Ciaucera de Tlisöra a Lungiarü erd endò

Dai 13 ai 20 messel vegnirál fat na desmostrazion coche an brujova ciauc zacan

de Giovanni Mischì

(LS:if) Dai 13 ai 20 de messel végnel a Lungiarü brujé ciauc. L'iniziativa metuda a jì per interessament dl' Assoziazion turistica pieta n program de cornisc rich de manifestazions y costituesc n'atrazion culturala daldut unica. Sce an lascia spaziré l uedl da na posizion plu alaut soura l paisc da Lungiarü y sia contreda entourn fora, veiden che al domineia chilò - a desfarenzia de autres pertes de Südtirol - l model d'ensediament romanich con les "viles" carateristiches. Te chest ambient rural sauta l osservadour plu acort vignitant ence te de "pici manufac da paur" sciche fourns da pan, festii, favés o ence valch ciaucera. Chisc é encuei testemones importanc per l'autarchia y l' independenza economica da n iade dla popolazion de chisc posc' y ai nes trasmet informazions interessantes soura la storia dl ensediament y l sfrutament dles ressurses locales.

Retrat : Paul Daporta (Paul da Grones) ciaria la ciaucera



Pian via da chestes conscidrazions à dant da n per de agn l comun da San Martin de Tor derturé su na vedla ciaucera situeda dlongia Tlisöra a Lungiarü. Dant da puech éla vegnuda ciarieda ite y dai 13 ai 20 de messel saràla al zenter de na majera manifestazion turistich-culturala.
Retrat : La ciaucera de Tlisöra do ch'ala é vegnuda dertureda su.

Do la seconda Gran Vera é a Lungiarü dutes les ciauceres vegnudes lascedes su, ales é tomedes adum o vegnudes implides ite con material. Ma chi che chier plu avisa sauta chilò y dailò ciamò te valch resc' de chisc fourns de produzion a n temp tant importanc. A Lungiarü fòvel i paurs dl post che brujova ciauc. La ciauc é un di materiai de costruzion plu vedli che i conescion: mescededa con saulon y ega fòrmela na bona mauta o an pò ence la tó da sblanchejé murs de costruzions interns y esterns. Per sia fazion corosiva vegniva la ciauc danadavia ence adoreda sciche meso da dejinfezion. Tl caje de coies végnel ence aldidancuei ciamò tout ciauc da sblanchejé fora les stales. Tl'agricoltura y tl'orticoltura vegn la ciauc adoreda per enculté. Ma dant che ala posse vegnì adoreda méssela naouta vegnì brujeda: brujé ciauc vegnìvel a Lungiarü de regola d'aisciuda dant che l laour alalergia metessa man o ence d'auton.

Retrat: da ciarié ite na ciaucera él aldidancuei demé plu puec che sà. Paul da Grones é ciamò un de chisc.

Per cie che reverda la prejenza de ciauceres a Lungiarü n'él encuei nia plu saurì avisa da dì tantes che al nen fova chilò - dessegur set o ot. Sce an va ti posc' olà che al fova dandavia chisc fourns, veiden che ai fova dagnora demez da les ciases, per la majera pert envalgò te bosch olache al fova ence legna assé da tizé y olache an ne messova nia conduje massa da dalonc adalerch les peres. Per cie che reverda les ciauceres da Lungiarü pòn dì che chestes ne vegniva nia brujedes artejanalmenter, ma dagnora demé per corì l debujegn tl caje che al vegniva frabiché. I caji olache l brujé ciauc vegniva ence sfruté per se davagné valch permez é dret puec. Per l'economia n'à perchel chesta ativité mai abù na gran emportanza. Encuei él a Lungiarü demé plu pueces persones che à te sia joeneza enstesses ciamò brujé ciauc. Dut l savei entourn chesta tradizion é perchel sun troi da vegnì desmentié o da jì a perde per dagnora. Paul Daporta (Paul da Grones) é ciamò un de chisc: sot sia direzion él dant da puech vegnù ciarié la ciaucera ressaneda dlongia Tlisöra y enjigneda ca per vegnì brujeda. Ma bele l impliment de n tel fourn é na ert per sé: al intern dl fourn végnel da empruma fat su con peres n gran out a sech. Les peres da ciauc da brujé vegn ciariedes ite da lassù ju sun l out y canche la ciaucera é plena végnela corida con dascia de pec o stram y lassoura végnel straihé n let de mauta de 8-10 cm gros. Tizeda vegn la ciaucera da l bochel judapé y an tol legna secia de pec. Da brujé na ciaucera adòren cater dis y cater nuetes y al va su na gran cuantité de legna (passa 100 metri). La ciaucera de Tlisöra é vegnuda brujeda l ultim iade su per i agn '50, dedò éla vegnuda lasceda su definitivamenter.
La "festa dla ciaucera" a Lungiarü vegn acompagneda da n program rich de manifestazions: escurscions geologiches, referac, vijita de nuet a la ciaucera che erd, seires de stories per mutons, vijites te posc' olà che al fova n iade na ciaucera, seires con entrategniment y aorela curta y n grum d'auter. La manifestazion entourn la ciaucera met man en domenia, ai 13 de messel da mesdì inant; da les 16.00 saràl la benediscion y spo vegn la ciaucera empieda.
Con chesta iniziativa vuelen recuperé y mostré su la funzionalité dles vedles ciauceres, bele da trueps agn lascedes su y desmentiedes. Duc é dret bel enviés a vegnì a ti cialé y a tó pert al program de cornisc che vegn metù a jì aposta per l'ocajion.

(Duc i retrac é de Mario Clara)


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Na iniziativa dla AT San Martin de Tor (ponc: 1)
da travers ai 04 July 2003 da les 17:01:29
(Infos sun l utilisadour | Ti mané n messaje privat)
Bela idea. Co fòssela pa sce an brujassa ence valch stria, al n'en mancia dessegur nia tla Val de Longiarü. Per mategnì les beles usanzes da zacan y per l plajei dla jent.
Na enjonta: na ciaucera valgamia ben conserveda pòn ence vedei sun La Crousc a Badia, dlogia la majon.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.362 seconc