Les tratatives per mete su la Lista LADINS é judes miec de co che an se aspitova. Al n'é nia sté rie de giaté assé candidac, mai tanc che en chest iade nen jiràl sun lista, 35 endut, emplin enscì fora la lista entiera. La majera pert vegn da les valedes ladines, ma al é anterite ence raprejentanc ladins dles maiours cités de Südtirol sciche Bulsan, Bornech y Maran. Giovanni Mischì, atual president dla LL é de bona creta y rata che al sie realistich arjonje cheles 6.000 - 7000 mile oujes. "35 candidac met tla ombria l candidat ladin soul sun lista dla Svp o di Verc y desmostra la volenté di ladins de avei democrazia", dij con sodesfazion Mischì che se à fistidié en pruma persona de mete adum la lista de candidac. Inoms ne végnel nia sclafé via ciamò, davia che an vuel fé na comparizion deberieda entourn i 20 de messel. Feter dut enjigné donca per les lites provinziales che vegn tegnides ai 26 de otober 2003.

Nia ciamò clarì daldut él chi che sarà capolista, Willeit o Mischì. "Chesta é na dezijion che mess empermò vegnì touta", à prezisé Mischì te na intervista deda encuei (02.07.2003) al foliet "Die Tageszeitung". 

Entourn 400 é stedes les respostes a la enrescida dla Lista LADINS maneda fora tla ultima edizion de sie sfuei de informazion. "Dutes les respostes ruvedes zeruch encorajeia la Lista de jì inant y valch un se à ence pité sciche candidat, n segn che la Lista à porté pro a na mioura informazion y a plu democratisazion", dij Mischi.