En domenia ai 29 de jugn, dut enjigné su dal bivach Bontadini
de Lorenzo Soratroi
Al ti tocarà a Fodom ospité en domenia ai 29 de jugn la 11eisema enconteda dles lies ladines da Mont, manifestazion che vegn tegnuda a roda da una dles valedes dl Sela. Al é bele da valgugn meisc che Gilberto Salvatore, president dla Lia y si colaboradours laora per mete a jì chesta enconteda che abina adum tres n grumon de jent. Dant da cater agn é la manifestazion vegnuda tegnuda sun Plan Boè. Chest iade à l'organisazion pensé de se porté da l'autra pert dla val, su per les crepes dla Meisola al “bivach Bontadini” sun l retrat.
La costruzion fova vegnuda penseda y metuda empé da Gilberto bele dant da feter vint agn y intituleda a la memoria dl Ten. Col Ernesto Bontadini. N luech simbol per nostes montes.
Colassù defat pòn ruvé tamben dal Jouf de Padon che da la ferata dla Meisola, olache an passa ence per cheles galeries ciavedes dai saudés entratant la vera. Tl medem temp pòn se gode na bela veduda sun la Marmoleda vijiteda da milesc y milesc turisc' che recorda l model economich da encuei de nostes valedes. Te chisc dis é sté n grup de saudés dl 7° regiment di alpini de Feltre, ma enciasés tla caserma de Reba, empegnés adum a n valgugn dla Lia Ladina da Fodom a comedé fora toc dla ferata y dl troi che ruva sun l bivach che con l temp se ova roviné. Dut é enjigné enscì per la manifestazion de en domenia. L program preveid da les 10,30 n intervent dl president dla Lia da Fodom, da les 11:00 vegniràl tegnì la S. Messa al “Bivacco” da Don Bruno De Lazzer. Dapò saràl la marena al refuge Padon che vegnirà ofrida per i sozes dl CAI da la Lia da Fodom, ma l’organisazion se cruziarà ence per i autri, i ostiers dl refuge Padon fajarà n bon priesc. “L fin dl’enconteda” dij Gilberto “ é chel de abiné adum dutes les persones scrites ite al CAI y duc chi che à laoré con gran vueia per concé i trois y les ferates y che fej deventé les spaziredes plu segures per chi che va chilò da nos al fresch . Al bivach “Bontadini” pòn ruvé dal Jouf de Federa, olache al é poscibel lascé l auto y depò jì da ilò entourn na ora y mesa a pé su per n troi dret saurì devers dl Padon. (LS:if)
