benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Carlo Willeit enconta l diretour dl Alto Adige Tiziano Marson
scrit ai 18 June 2003 da les 18:44:05 da noeles

Desvalives

 

Enconteda con l diretour nuef dl Alto Adige Tiziano Marson - Al vegn damané deplù lerch per i problems ladins

 

I dis passés se à damané Carlo Willeit, aconsiadour provinzial ladin, na enconteda con l diretour nuef dl sfuei da vigni dì "Alto Adige", Tiziano Marson per ti prejenté la situazion dla mendranza ladina de Südtirol y tles autres does provinzies de Trent y Belun y per conesce la minonga dl diretour soura la Plata di Ladins che vegn fora n iade a l'edema sun l "Alto Adige". La domanda é vegnuda azeteda y l'enconteda é steda dant n per de dis. La delegazion che é juda empera con Carlo Willeit tolova ence ite la presidenta dla Consulta per i problems di Ladins a Bulsan y aconsiadoura de comun Dolores Dariz y Berto Videsott desche capo-redadour dla Plata di Ladins sun l medem sfuei.



L diretour Marson à volù naouta vegni informé sun l numer di ladins, persoura la deslargiament dl sfuei Alto Adige anter la populazion ladina tla provinzia da Bulsan y foradecà y conesce n pue la sort de letura che i ladins fej. Al vegn recordé che la Plata di Ladins vegn publicheda te dutes trei les edizions dl sfuei: chela de Bulsan "Alto Adige", chela de Trent "Trentino" y te chela Belun "Corriere delle Alpi" , a chesta moda arjònjela duc i ladins decà y delà dai joufs. Mindicé dà la plata ence informazions pesoura i rumanc dl Grijon y samben ence i furlans. Per cie che reverda l deslargiament dl sfuei Alto Adige te sies 3 edizions tles provinzies se à desmostré Carlo Willeit dassen informé portan dant zifres valeda per valeda y al à enjonté che l bon slargiament se meritassa na mioura consciderazion per i comunicac dla Lista Ladins y chi di Ladins en general. Ence Dolores se à plulere baudié che i comunicac dla Consulta ne vegn nia for dés tres. L diretour é empermetù de ti sté do a la cossa a na moda che chesta volenté di ladins vegne respeteda.

Willeit à ence toché l sostegn finanzial a la Plata Ladina che é plutost megher. L contribut forfetar che vegniva dé enchin a sen y che é resté unfat da 15 agn encà ne cleca nia per mantegnì la strutura redazionala. L diretour à responù che al vuel se informé naouta plu avisa y che la chestion dla redazion é critica, davia che al volessa enchinamai scluje de autres redaziones talianes sciche chela da Persenon. Berto Videsott ti à splighé che al é does sortes de colaboradours: chi che vegn paiés diretamenter dal Alto Adige y chi da l'Union Scritours Ladins Agacins. L diretour à damané na lista avisa di colaboradours che vegn paiés da la direzion y per chisc él a una de dé ca valch deplù. L problem vegnirà ciamò toché te n secont temp canche l diretour arà duc i dac dantman y podarà valuté damiec la situazion. El enstes à rengrazié la delegazion dles informazions y dla creta che i Ladins mostra devers sie foliet.


 
Liams emparentés
· Deplú sun l tema Desvalives
· Chier te noeles


L articul plu liet te chest tema Desvalives:
Aiut Alpin Dolomites: sajon da d'isté dant porta


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.371 seconc