benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Passa 1000 pelegrins ladins dla Val Badia é jus en Jevun
scrit ai 12 June 2003 da les 20:24:49 da noeles

Cultura

 

Endò na gran cumpeida de jent con crousc en Jevun - Siour Merch y l vescul Wilhelm Egger acompagneia  la prozescion

 

Encuei (12.06.03) da doman adora é piés via entourn 1000 pelegrins da les dodesc ploanies dla Val Badia per jí con crousc sun Jevun dlongia Cluses tla Val dl Isarch, vedla senta vescovila. Propi na gran cumpeida sciche cordeles sun vedli trois fora per la taela,  tres l bosch y su per mont tres plu dalonc da ciasa. Les cures dl'auta valeda va da vedlamenter soura Juvel a Lungiarü y soura Munt de Furcia per ruvé a Santa Madalena ite insom Funes. Chi dla bassa Val Badia se abina empruma a Antermeia, va soura l jouf de  Börz y enconta spo chi dl'auta a Santa Madalena per jí deberieda a San Piere de Funes olache la prozescion é vegnuda touta ite solenamenter domesdí con mujiga y confalons. Tradizionalmenter végnel cianté tla gliejia de Funes la ciantia "Auf zum Schwur Tiroler Land" che recorda l vout de Tirol dl 1804 al Cuer de Gejú. L ploan da La Pli y l "comandant" dla prozescion, siour Merch Craffonara, ence chest iade endò sun la gruepa dl ciaval. Chesta outa, ann dla santificazion dl beat  Ojöp Freinademetz, á ence tout pert l vescul Wilhelm Egger per desmostré sie liam con i pelegrins ladins, desche al á dit. La prozescion de Jevun vegn tegnuda vigni trei agn y é una dles plu populares. Trueps se tol gen lede da impegns y laour entratant  i trei dis che va debujegn per jí y vegní soura mont via y ca. I agn dla prozescion de Jevun dess ester enzai de bogn agn. Les eles ne pò nia tó pert.



Ensnuet (12.06.03) é i pelegrins ruvés a San Piere olache ai stará souranuet te alberch, te ciases privates y pro i paurs. Endoman adora da doman va la prozescion inant contra Cluses, ruvan tl prum dantmesdí sun Jevun olache al vegnirá zelebré na messa solena. L meteman dla prozescion se perd ti nioi di temps, ma an rata, con bendebot de segurté, de podei afermé che la prozescion ae sies raijes tl 13eisem secul canche la mueria y i saioc fova stés de gran calamités te nosc raions. Con valch interuzions tl 17eisem y tl 18eisem secul é la prozescion vegnuda tegnuda viva enfin aldindancuei. Tl 13eisem secul, canche i prums pelegrins jiva soura i joufs,  rejonóven bonamenter tla pert itensom de Funés ciamò ladin y nia todesch desche aldidancuei. 

Per l'ocajion él vegnú enjigné da pert dl preve de Antermeia Campei Paul n liber de cianties y prieres aposta dal titul "Ojöp Freinademetz"  che servirá ence i pelegrins ladins en gaujion dl pelegrinaje a Roma per la santificazion dl beat Ojöp Freinademetz ai 5 de otober 2003. Per merit de chesta publicazion végnel prié y cianté scialdi per ladin chest iade.


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.350 seconc