Scí al referendum sun les servitus per sconé la proprieté - La mesura dopla dl Govern Provinzial
Te de piceres y mendres impreises ne pòl nia valei les medemes condizions de dert de laour desche te de gran impreises. Chest vel ence per l desliament de contrac de laour. Te de gran impreises se trátel de na organisazion formala y de razionalisazion depierpul che te de piceres impreises á l raport de confidenza na gran valuta. Datrai pò bele de mendres mudazions tl volum de laour y tl davagn te de piceres impreises ester de gauja da messei desmete personal. La lista LADINS é perchel per la regolamentazion atualmenter en doura che fej na desferenza danter impreises con plu de 15 laoranc - pro i paurs con deplú de 50 - y les autres impreises. Al ne vegn perchel dé degun consei per chest referendum. Ence zedoles blances á sia valuta te chest caje. Per cie che reverda l referendum sun les servitus per condutes eletriches é la Lista LADINS per l scí y chest nia per gauja che an ae la speranza che les servitus vegne toutes ju (chest ne suzed dessegur nia con l referendum), ma per arjonje che an mete plu averda y respete deplù la proprieté, la contreda y samben la sanité dles persones. Sun l retrat: l raprejentant ladin dr. Carlo Willeit.
La Lista criticheia te chest contest l comportament dl Govern provinzial che se baudia gen y gonot pro l Stat per la grovaria de sies servitus, ma ne bazileia nia canche al se trata de servitus a sie utl: la provinzia lieia duc i fabricac, i implanc publics y enchinamai valgunes infrastrutures publiches, sciche implanc portamont y pistes, con na declarazion de utl publich y chest vuel dí nia auter che espropriazion. Perchel dess la provinzia ence scoé dant sia porta, dij la Lista LADINS che á plu iadesc protesté contra chesta declarazion automatica de utl publich che vel sciche na espropriazion.
