Informazions publizitares scialdi ciaradouses, conescenza di lingac y stieres da mede
Te na interogazion tla senteda dl Consei provinzial enier (03.06.03) à l aconsiadour Carlo Willeit y l’aconsiadoura Cristina Kury critiché la publicazion de informazion de "reclam" ti foliec “Dolomiten”, “Zett” y “Alto Adige”, ajache chesta sort de informazion à plucheauter n carater propagandistich prelital y en plu se limiteiela demé a n valgugn media de stampa.
L costiment de 6.300 € a l’edema y l’adoranza dl dert da pert dl jonta de infomé la populazion soura sia ativité ne à nia convenciù i interogadours Kury y Willeit. Willeit é dla minonga che la jonta feje con de tel azions demé publizité propagandistica per la Svp a speises de duc.
La Lista ladins ghira l’abolizion dl lim de eté pro la promozion dles conescenzes de lingac foresc’
Te na mozion al Consei Provinzial ghira l aconsiadour provizial C. Willeit de tò ju l lim de eté (45 agn) , che é vegnù fissé da la jonta per la promozion dles conescenzes de lingac foresc’.
Do Willeit ne é chest lim nia adaté y ingiust, davia che ence l lim de eté per vegnì tout su tl servisc publich y l’eté de jì en pension é vegnù auzé de truep.
Y emparé lingac foresc’ é ence do i 45 agn na nezescité y samben ence de utl, y perchel ne à chest lim deguna giustificazion. Dit chest ghira Willeit de tò ju chest lim de 45 agn o almanco de l auzé a 60 agn .
Repartizion di primariac tl ospedal de Bulsan
Tl Ospedal de Bulsan végnel (aladò di media) partì su primariac anter l grup todesch y talian. L’ortopedia vegn assegneda al grup todesch. Te na interogazion al Consei provinzial damana l aconsiadour ladin Carlo Willeit:
- tant inant che al ne ti speta nia ence ciamò te chesta azienda sanitara (ASL) al grup ladin n primariat y
- sce al n’é encuei degun aspirant dl grup ladin per l primariat de ortopedia, do che al é dant da n valgugn agn propi sté n ladin a davagné l concurs per chesta stiera. (if)
