Maestri de schi enconta l raprejentant ladin Carlo Willeit
Entourn 60 aspiranc da maester de schi, da chilò y dla Talia dl nord, é stés tl Consei Provinzial a Bulsan. La vijita fej pert de sia formazion teorica. L Vizepresident dl Consei Carlo Willeit ti à dé l benvegnù y a la fin él vegnù fora na discuscion dret interessanta. Anter les truepes domandes y respostes él vegnù a lum n valgunes problematiches particolares che reverda i maestri de schi.
La pruma sun la concorenza anter les scoles de schi; do avei audì esperc prejenc él vegnù fora che la concorenza é bona y ala va scialdi debujegn davia che les scoles envedlesc for plu y plu, ajache la eté di maestri é tres plu auta. N secont pont reverda i acompagnadours da foradecà zenza titul o condizion de amiscion a la profescion; de chisc en él n grum, dantaldut tla sajon bassa; la cossa fossa da regolé n puech miec. La terza cossa, che fej marevueia y che se meritassa n ejam plu sot, é la relazion di maestri de schi con hoteliers y patrons de implanc; chesta tochassa for da ester bona. Per l Vizepresident Willeit é l’enconteda steda de utl y plajoula coche informazion y coche enconteda con joegn che ti va do a na profescion particolara. Danter chisc en fòvel ence n clap de ladins dles valedes entourn l Sela via, enscì la Lista Ladins te sie comunicat stampa. (if)
