benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Enseira con l vescul Wilhelm Egger
scrit ai 29 May 2003 da les 10:49:26 da noeles

Cultura

 

La figura dl beat Freinademetz conteda dal vescul tres sies letres

L referat tegní enseira a Bulsan tl zenter pastoral dla diozeja dal vescul Wilhelm Egger persoura la figura dl miscionar beat, siour Ujöp Freinademetz, á dassen plajù al publich metù adum da ladins, todesc y talians. An veid che l vescul crei tla personalité dl beat Freinademetz y se proa che la organisazion per la santificazion dl beat, ai 5 de otober, garete ben. Con n lingaz scempl y linear ál fat n cheder dl beat mostran su souradut l spirit miscionar, sia cura dles animes y sie encherscedum do chi da ciasa y sia valeda ladina, la bela Val Badia. Anter les autorités án podù vedei l vizepresident Carlo Willeit, l assessour provinzial Florian Mussner, l assessour ai afars soziai dl Comun da Bulsan, signoura Battisti, l aconsiadour Bizzo, l degan Noistenich...
"Y a les rondoles che jolova entourn l bastiment via, y una de chestes ti fova joleda sun la man, ti éssel volù dè na letra da porté sun Badia"



L vescul é vegnù prejenté da la presidenta dla Consulta per i Ladins da Bulsan y aconsiadoura te chest comun, Dolores Dariz. Pueces paroles de rengraziament dantfora y spo atira la parola al vescul. Sie referat à tout ite does pertes: la pruma na curta biografia dl beat fata per todesch, la seconda (per talian) na reflescion sun l spirit dl miscionar che fajova dut cant a la lum dla fede. Nasciù tl 1852 a Badia, si studes tl seminar da Persenon, olache al à ciamò messù fé d'autri doi agn de scola elementara per emparé l todesch y che al à spo emparé dret ben. Tl seminar da enlaouta vegnìvel rejoné dassen dles miscions per gauja de n professour che conesciova ben l miscionar Comboni. Te chest clima él nasciù la cherdeda miscionara dl beat. N iade deventé preve y entratant che al fova caplan a San Martin tla Val Badia él vegnù a conesce Arnold Jansen, l fundadour di miscionars verbic, y con chel che al s'ova enconté tla claustra/convent di capzineri a Persenon, canche Jansen vegniva zeruch da n viade a Roma. L joen caplan messova dantfora damané l'autorisazion a sie vescul da Persenon. A la domanda de Freinademetz à l vescul responù enscì: "Desche vescul dla diozesa diji de no, ma sciche vescul catolich diji de sci. L vescul savova che Freinademetz fajova dret ben sie laour sciche caplan a San Martin, la jent vegniva enchinamai da Funés ca per audì sies perdiches. Dret bon sie raport con i scolés da San Martin. Al é enscì pié via per la vita nueva da miscionar. Da empruma tla Olanda per emparé i lingac, ma bele a Desproch se sentìvel da spavent soul y sforzé a rejoné badiot demé con se enstes.

L cruze prinzipal de Freinademetz, à dit le vescul, é steda la formazion a la fede, l'orazion y la catechesa. Al fova n bon organisadour y al savova da crié comunités de orazion. Al é ruvé tla Cina canche al fova  n gran senn contra i politics europeics, dantaldut franzeisc y todesc. Perchel ti dijova a el la jent dl post "malan europeich" y ti en combinova de vigni colour. Al fova ence vegnù mazé doi miscionars. Freinademetz é mort l'ann 1908 per gauja dla malaria y dl tifus.

Tla seconda pert à l vescul recordé l miscionar, sie atacament a chi de ciasa, a sia valeda, a sie bel lingaz badiot, ma ence sie dret spirit miscionar. Freinademetz dijova: "Tant plu che an é sciurés sun na pert da la jent, tant plu ésen dlongia a Chel Bel Die". Imposcibel paradlé la meseria te si temps sun Badia con chela di pueresc cineisc. Perchel scrivòvel a chi da ciasa per talian: "Chi non è chiamato alla vocazione missionaria, non abbandoni la val Badia. Solo le croci ci sono dappertutto: dalla Cina alla Badia". Al recordova dantaldut sie paisc de Badia davia che al ova giaté la scinconda dla fede. Al é plu saurì se salvé te paisc cristians che te chi pagans y al recorda les orazions fates te familia. "Nos pagans" chilò on n grumon de dificoltés te chest vers. Ciamò do da 20 recordòvel i biei agn dla fede sun Badia. "La bella patria Badia, ma la vera patria sarà sopra le stelle". Miei cari, quando mi volete vedere o parlarmi, guardatemi e parlatemi nel Sacro Cuore di Gesù". Na gran carateristica de Freinademetz é chela de ester sté atira davert ai costums, al guant y al lingaz dl post. Al s'à atira vistì da cineis y à emparé ben sie lingaz. Enchinamai l Papa Paul VI, pro la beatificazion de Freinademetz, ti à apliché les paroles dites da San Paul: "Mi son fatto tutto a tutti". Per rejoné y traté endretura i cineisc s'àl astilé sciche n cineis. Te na letra scrìvel: "Non cambierei il vestito cinese neanche in cambio della corona dell'imperatore d'Austria". "Camminiamo tutti per una valle di lacrime, sia i badioc che i cineisc" "Ricordiamoci a vicenda, faciamo comunione di pensiero, soprattutto preghiamo gli uni per gli altri". Sun l viade devers la Cina, ruvé a d'Alessandria dl Egit, òvel mancia l son dl badiot. Al vegniva ence rejoné tiroleis, ma medret nia badiot. Y a les rondoles che jolova entourn l bastiment via, y una de chestes ti fova joleda sun la man, ti éssel volù dè na letra da porté sun Badia, ma al se temova che ala l'essa lasceda tomé a Lungega. Rondoles, saludedeme Sudtirol. Oramai podàrai demé plu rejoné badiot con me enstes y i spere de podei endò l emparé sun ciel. Da les letres veiden propi sie gran sentiment ladin, sie amour "a la bela Ladinia".

L vescul à sclut ju envian l publich a conscidré y a tegnì cont de valgugn de gragn ejempli dl beat: ester daverc a la cultura di autri, aprijé y defene nosta arpejon cristiana, vegnì endò zeruch a la orazion te familia per mantegnì la fede, se recordé y daidé ence finanziariamenter les miscions.

Sun domanda de Carlo Willeit à spo le vescul conté en curt dantfora dl program in gaujon dla santificazion che vegnirà publiché.

Dolores Dariz à rengrazié l  vescul per nes avei recordé i gran valours de nosta fede.


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 1
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.371 seconc