benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Union di Ladins da Fodom deida chi da Davedin
scrit ai 26 May 2003 da les 19:58:44 da noeles

Fodom

 

Undesc persones é restedes saredes ite dut l invern

de Lorenzo Soratroi

Fodom/Davedin. Ala é vegnuda scluta ju chisc dis passés la azion de sotscrizions che l’Union di Ladins da Fodom ova metù a jì d’auton via, per vegnì adencontra con valch de concret ti confronc dles undesc persones restedes saredes da la boa (smueia/roa) ti paisc de Davedin, Sotinglacia y Roncat. Coche duc recordarà, les gran pluevies a la fin de november  ova fat vegnì ju per ben does outes na boa sun la streda de Sotil. La seconda se l'ova porteda via daldut y defat scomenciòvel l’ijolament per les frazions "da de là". Duc dezidova, con gran coraje, de resté te sies ciases, savan che se mete tl invern essa volù di jì adencontra a de gran dificoltés. Na bona che l invern apeina passé é sté scialdi bon, con puecia neif y trueps dis de bel temp. Sun l retrat: te stua a Davedin entratant la sourandeda dl aiut.



Ma les dificoltés ne á nia mancé per chi undesc che à vivù y che viv ciamò encuei ijolés dal rest dla val. Plu outes él sté debujegn de porté al ospedal valch berba plu de temp, ài á abù da pensé de se porté ite da mangé per ei y per i animai y per chi trei joegn che vigni dì messova ruvé sul laour, l ert de n toch de streda da messei se fé vigni dì a pé o con la luesa a motor.

"Plu che auter él sté n stres psicologich" ài dit "chi da de là" a Nani Pellegrini, president dl’Union di Ladins da Fodom, che adum a n aconsiadour dl’Union, é ju ta Davedin per ti sourandé a la jent i 1850 euro trac su con la sotescrizion. Pensé che per vigni pice debujegn, méssen spene n muedl de temp demé per se mueve y en plu de messei passé soura na boa melsegura, é sté l majer cruze. Dut chest à desmostré l cruze, rebadì plu outes da l’Union di Ladins, che l invern passé tl ijolament, á ence volù dí se ciarié su speises en plu per chela jent che á bele dificoltés a se mueve sun stredes dret descomotes. Ades valch speranza en plu vegn dai laours che à metù man y che essa da seguré tost de podei passé ence con na machina. Entratant ta Davedin, via Roncat y sa Sotinglacia él ruvé la solidarieté dla jent che é passeda ence soura la boa fora. A "chi da de là" ti àl speté l ert de se despartì fora i scioldi con n critere dezidù y azeté da duc. L’Union di Ladins da Fodom rengrazieia duta la jent che à contribuì, desche ence chi esponenc politics ladins da souramont che ne à nia volù fè mancé la solidarieté di ladins da dlafora.


 
Liams emparentés
· Deplú sun l tema Fodom
· Chier te noeles


L articul plu liet te chest tema Fodom:
Truep entusiasm per mete su na compagnia de scizeri


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.359 seconc